Ondersteuners van die gewilde Afrikaans is Groot-konserte kan solank hul geld bymekaar skraap, want die organiseerders het pas nóg ’n paar konsert bygevoeg.
“Die vraag na kaartjies vir vanjaar se Afrikaans is Groot was só oorweldigend, dat ons twee ekstra vertonings bygevoeg het,” sê Brendon Hargroves, uitvoerende vervaardiger van Afrikaans is Groot.
Dié ekstra konserte sal op 30 November om 19:30 en 3 Desember om 13:00 plaasvind. Die organiseerders het ook vroeër vanjaar bekend gemaak dat die konsert nie meer plaas sal vind by die Moreletapark Ouditorium nie, maar skuif na Time Square se Sun Arena.
“Ons is baie opgewonde oor dié twee ekstra vertonings en natuurlik ook oor Afrikaans is Groot se nuwe tuiste by die Sun Arena by Time Square in Menlyn Maine, Pretoria. Gehore kan beslis uithaler vertoning verwag die jaar,” vertel Hargroves.
Dis egter nie al goeie nuus wat op Afrikaans is Groot-aanhangers wag nie. Die aap is uiteindelik uit die mou: Bok van Blerk gaan beslis by vanjaar se konserte optree. Nóg kunstenaars word binnekort vir hierdie vertonings bekend gemaak.
Nóg ’n kinkel in die kabel is dat kaartjies vir die ekstra konserte beskikbaar sal wees by Computicket.
Kaartjieverkope sal vanaf Woensdag, 30 Augustus om 09:00 open. Kaartjies sal by Computicket-kiosks, Shoprite/Checkers en House & Home winkels landwyd beskikbaar wees. Kaartjies is ook aanlyn by www.computicket.com of jy kan die kaartjies kantoor skakel op 0861 915 8000.