Eloff is terug met nóg ’n aansteeklike treffer – dié keer met ’n speelse en opregte liedjie wat beslis ’n glimlag op jou gesig gaan toor. Sy splinternuwe enkelsnit, “Country Probeer”, is ’n humoristiese blik op wat iemand alles bereid is om te doen vir liefde – selfs al beteken dit cowboy stewels, line-dancing en ’n bietjie “yee-haw” tussenin.
In dié lekker-luister liedjie vertel Eloff die storie van ’n ou wat smoorverlief raak op ’n meisie wat mal is oor alles wat met country-musiek, jag en Nashville te doen het. Hoewel hy self eerder ’n dag by die rugbyveld of om die braaivuur verkies, besluit hy om haar wêreld ’n kans te gee – om country te “probeer”.
LEES OOK: Eloff laat die vonke spat met nuwe album en splinternuwe musiekvideo
Met aansteeklike ritmes, ’n lekker saamsing-refrein en Eloff se kenmerkende charmante styl, bring “Country Probeer” ’n vars mengsel van Afrikaanse pop en country-invloede. Dis ’n liedjie vir almal wat al ooit buite hul gemaksone gestap het vir die een vir wie hulle lief is – en dalk meer daarvan geniet het as wat hulle wou erken.
Kyk die musiekvideo hier:
Eloff bewys weer eens hoekom hy een van Suid-Afrika se mees geliefde popkunstenaars is – met musiek wat nie net gehoor word nie, maar gevoel en saamgesing word.
So, maak seker jy’s gereed vir ’n bietjie country flair – gaan jy saam met Eloff “Country Probeer”?