Maak gereed om ’n splinternuwe stem op die Afrikaanse musiektoneel te ontdek – Alweer Dian is hier, en hy bring iets heeltemal vars en eerlik met hom. Sy debuutenkelsnit, “Klei”, is sopas vrygestel, saam met ’n treffende musiekvideo wat sy boodskap visueel gaan beklemtoon.
Met ’n styl wat jou onwillekeurig aan Noah Kahan in Afrikaans laat dink, is “Klei” ’n introspektiewe lied wat jou laat stilstaan en dink: “Gaan ek gelukkig wees met my besluite as ek môreoggend my oë oopmaak?” Dian, wat self die lied geskryf het, deel dat die inspirasie agter die snit kom uit die besef dat elke mens hul eie toekoms in die hande het – soos klei wat gevorm word deur jou keuses, jou drome en jou moed.
Die lied is vervaardig deur niemand anders nie as die bekroonde Murray Lubbe, en dra ’n vars klank wat opregtheid en nadenke in elke noot en liriek vasvang. Dian se digterlike aanslag en fyn oor vir emosie maak “Klei” ’n debuut wat moeilik is om te ignoreer.
“Daar is soveel vrae wat mens in die lewe vra – en aan die einde van die dag, lê die antwoord in wat jy daarmee maak,” sê Dian. Hierdie snit is nie net ’n lied nie – dit is ’n uitnodiging om self verantwoordelikheid te neem vir jou pad vorentoe.
Kyk die musiekvideo hier:
“Klei” is nou orals beskikbaar. As jy dit eenmaal gehoor het, sal jy dit verseker wéér wil luister. Alweer Dian is hier, en hy is besig om sy plek met eerlikheid, talent en natuurlik – klei – te vorm.