FOTO: Verskaf
Coleske Artists, tuiste van sekere van Suid-Afrika se grootste kunstenaars en die vervaardigers van gesogte produksies soos Afrikaans is Groot, Lexus Classics en vele meer, loods saam met Computicket ’n splinternuwe video-stromingsdiens om sodoende ’n moontlike inkomste vir kunstenaars én musikante te genereer. Die musiekbedryf trek swaar tydens die grendel van inperking as gevolg van COVID-19. Met dié projek sal lojale ondersteuners immergewilde konserte kan stroom teen sakpas kaartjiepryse.
“Ons harte gaan uit na ons kunstenaars en musikante wat swaar getref word gedurende dié moeilike tyd. Optredes is reeds voor inperking gekanselleer nadat die verbod op sosiale byeenkomste, met meer as 50 persone, aangekondig is. Sommige van hulle verdien reeds die afgelope maand nie ’n inkomste nie en ons weet nie vir hoe lank dit nog gaan duur nie,” het Arnold Coleske, Direkteur van Coleske Artists, verduidelik.
“Ons voel dis noodsaaklik om uit te reik en dis juis wat ons met dié inisiatief wil doen sodat ons hopelik verligting kan bring. As ons in ons onmiddelike omgewing kan hand bysit, sal dit ons almal help om aan die ander kant van hierdie krisis uit te kom,” het hy gesê.
Dié diens, getiteld INBLY-konsert of STAY-IN-concert, sal alle Afrikaans is Groot, Lexus Classics, Country is Groot en ander konserte volgens ’n skedule vrystel. Die eerste konserte wat geniet sal kan word, is Afrikaans is Groot 2019 asook Lexus Classics 2019. Hierdie twee konserte sal reeds teen Vrydag, 17 April beskikbaar wees om te stroom. Kaartjies sal R49,99 beloop en slegs by Computicket beskikbaar wees.
Sodra ’n kaartjie gekoop is, sal kaartjiehouers ’n skakel ontvang om die die konsert vir 72 ure – tot volle hoë definisie – in sy of haar huis te kan stroom. Alle winste vanuit die kaartjieverkope sal tussen die groep kunstenaars en musikante, wat deel was van die onderskeie produksies, verdeel word.
INBLY sal drie geleenthede bied om kunstenaars en musikante te help. Die eerste geleentheid is die opnames van alle vorige konserte wat gestroom kan word, die tweede sal kunstenaars die kans gee om konserte vanaf hulle huise aan te bied en ’n derde sal die publiek die geleentheid bied om donasies te maak om die musiekindustrie by te staan. Die platform sal ook beskikbaar gestel word aan die groter musiekbedryf of inhoudverskaffers om hulle deur die tydperk te help.
Meer besonderhede oor die konserte sal bekend gemaak word via Afrikaans is Groot se sosiale blaaie, alle kunstenaars se sosiale media platforms, media, asook op Computicket se webtuiste.