FOTO: Verskaf
Die sjarmante Willem Botha en die pragtige Franja du Plessis vat die pad met die kykNET Top20-toer en saam sorg dié twee vir ’n konsert wat jy nie gou sal vergeet nie.
Dié toer skop op 23 Februarie in Centurion af en hulle toer die land plat tot hul laaste vertoning, op 6 Maart, in George. Loer gou hier onder.
Die eerste konsert, op 23 Februarie, vind by die gewilde kuierplek Semi-Soet, in Centurion, plaas en boonop is toegang gratis! Daarna is Aliwal Noord, op 25 Februarie, aan die beurt by die Laerskool. Op 26 Februarie kan Queenstown regmaak vir dié twee se optrede by Linga Linga Lodge. Laerskool Cradock is op 27 Februarie die tuiste van dié opwindende konsert en op 28 Februarie is Graaff-Reinet aan die beurt met die optrede wat by Laer Volkskool gehou word.
Port Elizabeth is op 1 Maart aan die beurt as hulle by The Barn gaan optree en op 2 Maart is hulle in De Aar by die GWK Karoofees in aksie. Daarna is hulle weer terug in die Oos-Kaap, in die pragtige kusdorpie Jeffreysbaai, as hulle op 3 Maart by The Bay Pasta Co. optree. Middelburg kry ook ’n beurt op 4 Maart met hul konsert by dié dorp se Hoërskool. Op 5 Maart kuier hulle by Brian’s Grill, op Oudtshoorn en op 6 Maart eindig hulle dié toer af in George by Shenanigans.
Willem het eers in Afrikaanse musiekliefhebbers se harte geklim as sanger, maar het ook gou sy veelsydigheid gewys as akteur. Hy het in 2010 sy buiging as akteur gemaak in Liefling, Die Movie, waarna hy ook in die musiekblyspel, Tree Aan, ’n rol vertolk het. In 2013 vertolk hy ’n hoofrol in Donkerland en speel weer ’n hoofrol in die musiekblyspel, Reik Na Die Sterre, in 2014. Willem was ook die heel eerste Afrikaanse kunstenaar wat deelgeneem het aan die merkwaardige Eurovision Song Contest. Vandag kuier Willem elke Vrydag in ons leefkamers as aanbieder van die Top20-program, op kykNET NOU!, waar hy weekliks die ranglys aftel van die week se beste musiekvideo’s. Willem se album, Soen en Vergeet, wat in 2017 vrygestel is, bevat ook sy treffer, Swartskaap.
Die pragtige Franja het in 2013 haar debuut in die industrie gemaak as Marna, in die fliek, As jy Sing. Daarna is haar debuutalbum, My verhaal, in 2016 vrygestel én spog met platinumstatus. Haar nuwe album, Hittegolf, het getrou aan die titel gebly en omtrent ’n hittegolf veroorsaak met verskeie van die liedjies op dié album wat gereeld op radiostasies landwyd gehoor kan word.
Kyk hier na die lokprent:
Die eerste kykNET Top20-toer word moontlik gemaak deur CO Productions, kykNET, kykNET NOU, Green Planet Productions, SoundCheck Productions en Lightspeed Digital Media.