FOTO: Verskaf
Die sangeres Geraldine B se enkelsnit Ek wil jou hartklop voel beloof aanhangers van die eerste noot van dié liedjie, tot haar stem wegsterf met die laaste note van haar vertolking, mee te voer.
Geraldine B is bekend vir haar nostalgiese ballades en met Ek wil jou hartklop voel voer sy haar stem tot nuwe hoogtes. “Ek wil jou hartklop voel laat my voel dat liefde bo enigiets kan wen.”
Oor dié liedjie sê die sangeres, wat op die Vrystaatste dorpie Wesselbron woon: “Liefde bestaan en is regtig iets spesiaal. Die liedjie is geskryf vir en opgedra aan my wonderlike man. Dit is maklik om oor iets te sing waarby ek kan aanklank vind. Die liedjie vertel die storie van liefde en hoekom ’n mens daarvoor sal baklei.”
Die liedjie is uit die pen van die bekende liriekeskrywer Pierre Rossouw.
Luister hier na ’n voorskou:
Geraldine B het al gedurende haar skooljare haar stempel in die musiekbedryf afgedruk. Haar stem is al met dié van die bekende gospelsangeres Kari Jobe vergelyk. “Dit is vir my ’n groot voorreg om te hoor dat ek nogal soos sy klink. Kari is my grootste musikale inspirasie,” sê sy.
Geraldine B het verlede jaar met haar debuutalbum Wintersnag gedebuteer en die gelyknamige liedjie is baie goed deur plaaslike radiostasies ontvang. Geraldine B is een van die nuwe generasie sangeresse wat dopgehou moet word. Sy het haar eie styl en ’n unieke stem wat met geen ander sangeres in dié land vergelyk kan word nie. Sy glo ook musiek moet jou moeiteloos goed oor die lewe laat voel.
“Ek is nie in die musiekbedryf om bekend te wees nie. Ek sing omdat ek dit geniet om my musiek met mense te deel. Ek wil mense met my musiek aanraak.”
Sy het onlangs ’n musiekvideo van haar liedjie Kaalvoet in die druppels vrygestel en die video behoort eersdaags op kykNET se musiekkanale uitgesaai te word. Twee van haar ander liedjies gaan ook later dié jaar in musiekvideo’s verewig word.