Anna Davel laat Boerneef-treffer herleef

FOTO: Verskaf

Anna Davel is een van die sterre in Lefra Produksies se trefferproduksie, Flennie die Snare, wat hulde bring aan Boerneef in woord en klank.  

Dié produksie het reeds suksesvol reg oor die land getoer.  Lefra het die besluit geneem om ’n CD, Flennie die Snare op te neem en Anna Davel het ’n splinternuwe toonsetting gedoen van Boerneef se Jou Woord.  

Boerneef was een van die Afrikaanse skrywers wat ’n meester was met die ‘woord’. Frans Swart, die regisseur van die produksie, het daarom vir Anna gevra om juis hierdie liedjie te toonset en te sing. “Ek het sommer geweet dat Anna se styl perfek by die liedjie gaan pas. Dit word lig en opgewek aangebied en daar is Anna se besliste jazz invloed te bespeur. Ons glo dat Jou Woord sommer ’n groot treffer gaan word,” vertel Jaconell Mouton, die musikale regisseur van die produksie.

Met ’n kombinasie van haar soel stem, sielvolle optredes en pragtige liedjies wat sy skryf, fassineer die veelsydige Anna Davel al vir twee dekades gehore. Haar loopbaan het in 1997 begin toe sy as die algehele wenner van die jaarlikse ATKV Crescendo-kompetisie aangewys is met haar eie komposisie, Viooltjies, wat haar gevestig het as sanger, liedjieskrywer en kunstenaar. Die liedjie het ’n merkwaardige indruk gemaak met sy tema van huishoudelike geweld. Sy het haar diploma in ligte musiek en Jazz aan die Tshwane Universiteit van Tegnologie in 1998 verwerf, en het in dieselfde jaar by die gewilde groep Cutt Glas aangesluit, waar sy lid was tot 2003, waarna haar solo-loopbaan vlam gevat het, en sy sedertdien nege albums en ’n DVD uitgereik het en talle musiekproduksies vir teater en feeste die lig laat sien.

Die res van die sterbelaaaide rolverdeling en kreatiewe span in Flennie die Snare sluit in Chris Chameleon, Johny Klein en Daniella Deysel, wat die verhoog met Jaconell Mouton (musikale regisseur), Mauritz Lotz en Riaan van Rensburg deel. Frans Swart het die teks geskryf en hanteer ook die regie. Die produksies is moontlik gemaak deur die ruim ondersteuning van die Innibos Laeveldse Nasionale Kunstefees.

Jou Woord is die tweede enkelsnit vanaf die CD van die produksie, wat onlangs vrygestel is. Die res van die CD bestaan uit bekende en nuwe verwerkings van Boerneef se bekendste poësie deur onder andere Chris Chameleon, Daniella Deysel, Laurika Rauch, Louis van Rensburg, Rudolph Pretorius en Steffie le Roux Marais.

Alhoewel Boerneef hom aanvanklik op die prosa toespits, slaan hy later oor na die poësie, eers met ’n paar gedigte in die verhalebundel Teen die helling en later met volwaardige digbundels. Sy volksverse bring vernuwing in die digkuns weens die aardsheid en moderniteit daarvan.  Die musikaliteit en ritme is veral kenmerkend van sy gedigte. Dit is juis hierdie musikaliteit van sy poësie wat onder andere die komponis Pieter de Villiers geïnspireer het om heelwat van Boerneef se bekendste gedigte te toonset, waaronder Die berggans het ’n veer laat val en Aandblom is ’n witblom. Dit was ’n belangrike toevoeging tot die repertoire van die Afrikaanse liedere, en ’n gunsteling van die wêreldbekende Suid-Afrikaanse sopraan Mimi Coertse.