FOTO: Verskaf
Na die reuse sukses van Joe Foster se eerste Engelse snit, Look Away, is dié sanger terug met ’n popliedjie wat beloof om nog lank op menigte radiostasies se trefferparades te boer.
One Body is ’n liedjie wat Joe geskryf het na hy eendag op ’n troue gesing het. “Die dominee het vertel hoe die paartjie emosioneel en fisies een word met mekaar. Hul begin dieselfde dink, dieselfde lewe en voltooi mekaar se sinne. Die liedjie is dus die oomblik waar twee mense een word,” vertel hy.
Joe sê dat hierdie liedjie een van die sterker liedjies is. En omdat sy jongste album, Volgende Stap, ’n mengsel van Engels en Afrikaans bevat, wou hy sy Afrikaanse enkelsnit met ’n Engelse een opvolg.
Die sanger is van mening dat die liedjie aanklank sal vind by die wat al in ’n liefdesverhouding was of wil wees. “Ek sal graag wil hê dat One Bodyin luisteraars se are sal ingaan en dat couples dit deel van hul intieme playlist sal maak,” sê Joe.
Luister hier na ’n voorskou:
Oor die musiekvideo vir die snit, wat sommer vroeg saam met die enkelsnitvrystelling kom, wil Joe nie te veel verklap nie.
Joe Foster is geen vreemdeling op die Suid-Afrikaanse musiektoneel. Hy het immers bekendheid verwerf as lid van die mansgroep ADAM en het gesorg vir, Pad Na Jou Hart, wat die temalied vir die gelyknamige lokettreffer is.
In 2015 het hy die Ghoema-toekenning vir Liedjie van die Jaar vir Sal oorlog vir jou maak ontvang en in 2016 is sy debuut solo-album,Hartklank, as Pop-album van die jaar aangwys.
Alhoewel Joe reeds twaalf tot vyftien jaar as vervaardiger en musikant besig is, is dit vanjaar sy negende jaar as Afrikaanse sanger.
Die sanger glo dat emosie die suksesresep is wanneer daar musiek geskryf of gesing word. “Emosie soek altyd ’n manier om uitgedruk te word en musiek en liedjieskryf is gewoonlik die eerste plek waar my emosies wil gaan om uiting te gee,” verklap hy.
Deesdae werk Joe ook as life coach en spiritual guide en tussen deur wil hy nogsteeds musiek maak. Verder bemark hy sy jongste album en tree ook gereeld op.