FOTO: Verskaf
Die sanger Hugo Nieuwoudt, wat verlede jaar sy splinternuwe album, Net soos die sneeu vrygestel het is terug met ’n nuwe enkelsnit wat beloof om ‘ou gevoelens’ weer te laat opvlam.
Ou Gevoelens, Hugo se duet met die pragtige Lianie May, is ’n kontemporêre-popliedjie uit die pen van Werner Beukes en vertel hoe al die ou gevoelens opnuut weer vlam vat tussen ou skool liefdes wat mekaar na soveel jare weer raakloop
Hugo sê dat hul op die enkelsnit as sy volgende radiotreffer besluit het juis omdat dié liedjie ’n groei in digitale verkope getoon het. “Ek hoop die publiek word verras en hou daarvan. Dis vars en ’n lekker saamsing liedjie waarop ’n mens kan dans ook,” vertel hy.
Op haar beurt voeg Lianie May by: “Ek het dit so geniet om saam met Hugo aan die liedjie te werk en sien uit om te hoor wat die publiek daarvan dink.”
Luister hier na ’n voorskou:
’n Musiekvideo vir die liedjie is ook in die pyplyn, maar hieroor wil Hugo nie te veel verklap nie.
Hugo, wat in KwaZulu-Natal gebore is, is reeds vyftien jaar besig in die musiekbedryf. Hy sonder veral die werk van Bobby van Jaarsveld, Juanita du Plessis, APPEL en Elvis Blue uit.
Hugo skryf musiek wat met hom praat en waarmee hy kan assosieer. “My geliefdes inspireer my om te skryf. So ook die alledaagse lekker en gebeure van die lewe,” vertel Hugo.
Hugo sonder sy jongste album as een van sy hoogtepunte uit en is druk besig om die bemarking van die enkelsnit te voltooi. Verder word daar beplan aan ’n toer vir die jaar met stoppe in Noord-Wes, Gauteng en die Vrystaat.