FOTO: Verskaf
Ná die suksesvolle uitverkope vertoning by die Sun Arena in Pretoria verlede jaar, het Kapenaars gesmeek vir ’n Francois van Coke & Vriende-konsert in die Moederstad.
Francois van Coke is grootgemaak in die Noorde van Kaapstad en het bekendheid verwerf as die voorsanger van die rockgroepe, Fokofpolisiekar (2003 tot nou) en Van Coke Kartel (2007 tot 2017).
In 2015 het Francois se solo-loopbaan met die ballade van die jaar, Toe vind ek jou, ’n duet met Karen Zoid afgeskop.
In 2018 het Francois besluit om sy vyftien jaar as rock ikoon en plaaslike musiek pionier te vier. Die resultaat was ’n twee-ure rock-skouspel aangebied deur Francois; wat verskeie kunstenaars saam met wie hy van die gewildste treffers geskep het ten toon stel.
“Ek het die voorreg gehad om met gesoute kunstenaars in Suid-Afrika te werk. Die Francois van Coke & Vriende 2018 Pretoria konsert, was sonder twyfel die hoogtepunt van my loopbaan. Dit het net sin gemaak om die konsert na my stad, Kaapstad te bring. Maak nie saak wat jy doen nie, moet net nie die spesiale aand misloop nie,” het Francois oor die rock-skouspel gesê.
Die ruggraat van die konsert is Francois van Coke, wat saam met sy band, Die Gevaar ’n paar liedjies van sy solo-loopbaan sal opvoer. Gedurende die vertoning gaan van sy vriende aansluit by hom om die liedjies wat hulle saam geskep het en liedjies vanuit hul eie katalogus te sing.
Die vriende vir Kaapstad is: Jack Parow, Majozi, Fokofpolisiekar, Die Heuwels Fantasties, Laudo Liebenberg, Coenie de Villers, Early B, Arno Carstens, Van Coke Kartel en Riana Nel.
Kaartjies vir die konsert is nou beskikbaar by Computicket. Klik hier om joune aan te skaf.
Vir ’n voorsmakie, loer hierna: