FOTO: Verskaf
Manie Jackson se gewildheid vier hooggety en sy loopbaan stoom voortdurend tot nuwe hoogtes voort. Sy vars nuwe album, Op ’n hoë noot doen die titel uitstekend gestand en is van omslag tot omslag gevul met eersteklas musikale beder.
Hierdie album beslaan ’n keurige versameling van Afrikaanse en Engelse liedjies – van immergroen bekendes to blinknuwe skeppings. ’n Hele vyftien snitte met nagenoeg ’n uur se vermaak wat enige iets van kontemporêre stukke, tot country, tot goue oues en selfs ’n paar geestelike items insluit.
Die oorspronklike werke op die album wissel van dieper en meer ontspanne snitte soos Donker hart, Vrou uit ’n miljoen en Goeie genade tot dansbare liedjies soos Santa Maria en Lief en lewe, sowel as ’n lekker country-jodel-bederf in die vorm van Onthou se jodel – iets wat jou sommer goedsmoeds na jou beste paar two-step-skoene sal laat gryp!
Dekweergawes sluit fantastiese uitvoerings van Gé Korsten se Liefling, Al Martino se Blue Spanish Eyes, Pedro Infante se Cuccurucucu Paloma en Bobby Vee se Take good care of my baby in. Verder is twee aangrypende geestelike snitte ook op die album bygewerk – die bekende Praat ek mense eng’le tale en Die Onse Vader – ’n unieke toonsetting op For auld lang syne se wysie.
Die Hemel weet – Manie se duet met sy held, die toe sewejarige Keagan Rossouw – is ’n juweel wat hartsnare behoorlik sal prikkel. Keagan lei aan ’n rare beenmurgsiekte en is ook gehoorgestrem, maar laat geensins toe dat dit ’n demper plaas op sy merkwaardige sangtalent nie.
Op ’n hoë noot is ’n diverse album wat ’n ryke verskeideinheid musiek in ’n spog-vertoonkas verpak – een wat ’n gereëld besoekte hoekie in jou musiekversameling moet beklee!
Die album is nou landwyd en digitaal beskikbaar. Luister die album op Apple Music hier: