FOTO: kersfeesskouspel.co.za
Op 16 Desember gaan kunstenaars soos Anna Davel, Steffie le Roux, Saarkie, Amanda Strydom, Helena Hettema, Brendan Peyper en Louis Loock op die verhoog in die Sun Arena van die Time Square in Pretoria staan vir ’n betowerende Kersfees Skouspel onder leiding van Jaconelle Mouton.
Frans Swart van Lefra Produksies is die regisseur van dié konsert wat in 2006 vir die eerste keer aangebied is. Die konsert gaan ook ’n nuwe a-capella groep insluit en ’n volledige orkes.
“Dis belangrik dat die konsert ’n goedvoel-produksie is,” sê Jaconelle. Volgens Jaconelle kies Frans gewoonlik die kunstenaars, maar betrek haar by die besluite. Sy maak dan voorstelle op grond van kunstenaars met wie sy onlangs saam gewerk het. “Dit is baie lekker dat dit ’n groep uiteenlopende kunstenaar is. Dit lewer lekker verrassings op wanneer ons duette wil doen en dit sal dan iets wees wat jy nog nog nooit gehoor of gesien het nie,” voeg Jaconelle by.
Jaconelle, wat ook die musiekregisseur van die SABC 2-musiekspeletjiesprogram, Noot vir Noot is, staan agter die klawerbord op Kersfees Skouspel.
Alhoewel konsertgangers kan uitsien na treffers soos Stille Nag en O Holy Night is daar ook heelwat verrassings op die program. “Daar’s net ’n seker aantal Kersliedjies so ek vra die kunstenaars gewoonlik vir hul voorkeurliedjies,” gesels sy verder.
Die konsert vind op 16 Desember om 15:00 in die Sun Arena plaas en kaartjies wissel tussen R65 en R295. Kaartjies kan nou by Computicket gekoop word.