FOTO: Willem Botha
Die Ghoema-bekroonde musiekgroep Tussen Sterre het pas hul eerste enkelsnit Jonk in Afrikaans vanaf hul splinternuwe album, wat in die nuwe jaar vrygestel gaan word, uitgereik.
Dié liedjie, wat ’n gesamentlike poging deur twee van die lede; SJ van Dyk (lirieke, hoofmelodië, kitaar komposisie, musiek produksie) en Martin Earle (kitaar komposisie) is, gaan oor die betekenis om jonk in Afrikaans te wees. “Of dit nou jonk van gees of fisies jonk is, beskryf hierdie lied hoe ons as jong, Afrikaanse mense die lewe geniet en wil geniet,” vertel die trio oor die pop-, rockliedjie met ’n unike ‘Tussen Sterre’-klank.
Die liedjie het ontstaan as ’n temalied-versoek deur die organiseerders van die Jonk in Afrikaans-konsert en het uiteindelik as ’n boodskap aan die jeug oor hoe hulle voel in Afrikaans begin blom. “Ons het op ’n stadium besef dat ons besig was om te vergeet om onsself as jongmense te geniet en ook dat ons dit soms as vanselfsprekend aanvaar het. Daar en dan het ons besluit om hierdie liedjie te skryf om mense net weer te herinner om die jong, Afrikaanse persoon binne hul kans te gee om weer te glimlag en te dans,” vertel SJ.
Volgens Martin lê die liedjie hul na aan die hart omdat hulle gereeld met jongmense te doen kry. “Ons ervaar die geluk en eerlike vreugde wat plaasvind en wil dit graag met die wêreld deel,” voeg hy by. “Ons dink dat mense van alle ouderdomme van hierdie liedjie gaan hou, juis omdat dit gaan oor wat dit beteken om jonk, en jonk (al is jy oud in ouderdom) van gees te wees. Mense kan lekker dans en saamsing en die lied voel skoon bekend wanneer mens dit vir die eerste keer hoor.”
Luister hier na ’n voorskou:
Die musiekvideo, wat deur Ruan Kotze en Hencas van Huyssteen van The Reel Thing opgeneem en vervaardig word, word in die middel van November uitgereik. In die video word verskillende karakters op ’n bus na ’n Tussen Sterre-konsert vervoer. “Die storie kombineer tipiese voorbeelde van mense wat vergeet het hoe om jonk te wees met ’n energieke optrede wat weer die jongmens in hul wakker maak. Stories van mense wat heeldag werk, tot ’n oupa wat sy kierie neergooi word vertel om die transformasie te beklemtoon van hoe mens weer jonk kan wees,” vertel die manne.
Blaai hier deur foto’s agter-die-skerms by die verfilming van die video:
FOTO’S: Verskaf
SJ van Dyk, Martin Clifford Earle en Jan-Mattys van Lill is die drie lede van hierdie nuwe Afrikaanse pop/rock-groep, Tussen Sterre, wat in 2015 gestig is. Hulle eerlike lirieke, energieke musiek en elektriese klanke sal aanklank vind by oud en jonk.
Tussen Sterre se passie vir musiek is so groot soos hulle toewyding tot die Afrikaanse taal. Dit blyk duidelik uit hulle lirieke. Hulle beplan om die Afrikaanse musiekmark te revolusioneer met hulle unieke skryfstyl en passie om die taal lewendig te hou. Al drie van hulle is kranige musikante en spesialiste in hulle veld – SJ speel dromme, kitaar en klavier, Martin is ’n kitaaronderwyser en Jan-Mattys ’n sangonderwyser.
In 2017 het die groep hul debuut-album, Kosmies, vrygestel wat ook aan dié groep drie Ghoema en ’n Huisgenoot Tempo-toekenning benoeming besorg het. Vanjaar is ook ’n groot jaar vir die manne; nie net het hulle opgetree by feeste groot soos Innibos, Kirkwood Wildsfees en Jonk in Afrikaans nie, maar het ook die Ghoema-toekenning vir Publiek se Gunsteling duo/groep opgeraap.
Die unieke naam vir die groep het ontstaan uit die gesegde: “Reach for the sky, even if you miss, you’ll end up amongst the stars.” Alhoewel een van die lede egter Batman is, is Tussen Sterre hulle grootste passie en lekkerste droom om as vriende saam uit te leef. Dit is nou amptelik: Tussen Sterre, skitter helder, dag of nag!