FOTO: Verskaf
Hierdie is wat gebeur wanneer ’n boer van die Noord-Kaap sy hart, rou en eerlik, oopmaak en lirieke én note neerpen terwyl die stof laag oor die werf seil en die hoop nie beskaam vir elke wolkie wat aankom in die verte nie. Sonder om stereotipies te word, kan jy wegskuil agter die waarheid dat die hart van ’n boer afhanklik en oorgelewer is aan genade en hoop en wanneer ’n boer sy hart oopmaak, dit eerlik en opreg is.
Ná sy ‘eerste kans’ wat hy die musiekbedryf aangepak het met sy debuut-album, Laaste Kans en die sukses van sy tweede album, Opge-Rhaap, is Jan Rhaap terug met ’n splinternuwe album, Wat Is Mens?
Weer eens sing hierdie plaasseun in jou hart in met sy sterk stem, eerlike lirieke, goeie verwerkings en oorspronklike liedjies. Dis verkeerd om mense te vergelyk, maar hierdie voel amper soos ’n moderne weergawe van Koos Dup. Musiek wat nog lank in ons harte gaan boer.
Die album is vol gelaai soos ’n skaaplorrie met oorspronklike musiek. Ramskilpad is ’n tong-in-die-kies liedjie, wat die vrouens (kamtig) nie mag hoor nie, wat oor ’n mannesamekoms handel. Met Byt Vas en Ruk Die Pleister Af maak Jan sy hart oop en sing van moed hou, vasbyt; vir die lewe asook die liefde.
Kyk die musiekvideo vir Ramskilpad hier:
Plattelandse Droom pas nie net perfek op die album nie, maar ook by hom as mens. As jy die Griekwaland se wêreld ken, sal jy weet dat dit reën is wat jou drome waar maak…
Vrede In My Hart is ’n treffer in wording wat tans ’n spieëlbeeld van Jan se lewe is. Die smag na ’n plek waar die stilte raas, weg van die stad se gejaag. Hier sing hy van iets waarna ons almal smag. Hy sluit af met ’n droom wat baie met hom deel; ’n Huisie In Die Bos.
Jan sing eerlike, oorspronklike musiek met goeie verwerkings, en al sou jy al die tegnologie van hom moes wegvat, gaan hy nogsteeds jou nostalgies laat word met die idee van liedjies wat jy om ’n vuur na kan luister met net ’n kitaar.
Jy sien Griekwaland. Jy voel die liefde en verlange. Die bietjie stout sit ’n glimlag op jou gesig, maar hierdie album wys jou hoe ’n boer jou hart kan sag sing en jy met elke liriek kan identifiseer op jou eie manier – deur jou eie storie.
Hierdie album gaan jou hart se hande agter hom rug vasbind en wys, Wat Is Mens eintlik.