Valeska Muller se musiekvideo is hier!

FOTO: Nic Billington

Valeska Muller se moderne popmusiekverwerking, Verdwaal Saam Met Jou, is gedurende September 2018 aan radiostasies landswyd uitgereik en aanhangers kan nie genoeg van haar unieke stem en musiekstyl kry nie!  

Sy trek aandag waarookal sy gaan en die liedjie bly in jou kop vassteek.  Die musiekvideo vir hierdie opgewekte dansnommertjie wat sy saam met Tertius Jacobs en Sean Butler geskryf het is pas bekendgestel en gaan jou asem wegslaan.

Kyk die video hier:

 
Die musiekvideo vir dié treffer is verfilm by Estate D’Afrique in Hartebeespoortdam. “Hierdie is ’n pragtige lied wat handel oor passievolle liefde en ek wou dit vasvang in die video. Ek wil verdwaal saam met die man van my drome, ek wil net wegraak vir ’n oomblik, sonder al die stres en geraas van mense wat ons pla. Tog iewers in ons impulsiewe avontuur van verlorenheid en rigtingloosheid, kom ek by my bestemming uit. In sy liefdevolle arms en oë vind ek myself, wat duidelik in die video vertolk word,” deel sy opgewonde.

Valeska en Nic Billington, wat die regie van die video hanteer het, het saamgewerk aan die konsep, terwyl Hannelie Burger omgesien het na die skoonheidsaspekte en Dane Hildebrandt die manlike hoofrol gespeel het.

LEES OOK: Valeska Muller stel pop-dansliedjie bekend

Die musikant, wat al negetienjaar in die musiekbedryf werk, sonder haar deelname aan die musiekrealiteitsprogram, Zing, uit as een van die hoogtepunte van haar loopbaan en meen dat haar plek in die Top 7 van die kompetisie vir haar baie deure oopgemaak het. ’n Tragiese ongeluk, gedurende ’n mediageleentheid vir die verhoogproduksie Sexy and the City, het amper haar droom verwoes, maar opgee was nie vir haar ’n opsie nie.

Sedertdien, het sy al hoofrolle gehad in verskeie verhoogproduksies, soos Richard Loring seGirl Talk, Sonsak Jolyt, Dance Mania, The Seven Wonders Show, The Awesome 80’s Show en The Lets Twist Again Show. Die blondekop is ook ’n bekende gesig op die kassie en het al in verskeie advertensies en programme, soos Generations, Roer Jou Voete, One Way enBinnelanders gespeel. Een van haar liedjies is ook gebruik as die temalied van die program, ’n Ster Vir My Bed, op VIA.

Verdwaal Saam Met Jou het ’n opgewekete en ritmiese deuntjie wat verweef is met interessante elemente en klanke, asook ’n indrukwekkende stem wat nie net van Valeska Muller ’n huishoudelike naam in dans- en kuierplekke gaan maak nie, maar ook die treffersparades van die land se grootste radiostasies gaan oorheers.