FOTO: Willem Botha
Lianie May, wat reeds vir elf jaar in musiekliefhebbers se huise kuier, sê sy gaan volgende jaar ’n ‘nuwe fase’ betree.
In 2019 kan aanhangers van dié sangeres uitsien na ’n nuwe Lianie wanneer sy haar kenmerkende country voorkoms vir ’n ‘mooi’ en ‘sexy’ voorkoms verruil.
“Ek is ’n boeremeisie en sal altyd een wees. Ek boer self, maar dis tyd vir ’n mooi en sexy look. Ek het baie inspirasie van Carrie Underwood en JLo gekry. Dis die eerste keer in my loopbaan dat ek my eie fotosessie en stilering kon doen, en dit was lekker,” vertel Lianie.
Die begaafde sanger en deesdae fotograaf, Willem Botha, het gesorg vir die pragtige foto’s. Bravo! het ook op stel ingeloer tydens die fotosessie en ’n uitsending is vir vroeg in Januarie 2019 geskeduleer.
Die nuwe jaar lyk ook heelwat rooskleurig vir Lianie. Nie net spog sy met ’n nuwe voorkoms nie, maar sien ook uit na die talle opwindende projekte wat in die pyplyn is .
Een van dié opwindende projekte is haar nuwe duet-album saam met Jay. Beste van J&L is eersdaags op die winkelrakke en bevat die gewildste treffers deur die duetpaar. Aanhangers kan ook uitsien na drie splinternuwe liedjies. ’n Musiekvideo vir een van die nuwe liedjies word ook vir later die jaar beplan.
Nóg ’n projek is die uitreiking van die enkelsnit, Roepstem. Dié snit wat op Die Gelofte-versamelalbum is, is geskryf vir die volk en raak elke Afrikaner diep. Die lied beloof om groter as Pretoria, ’n snit wat Lianie in 2008 beroemd gemaak het, te wees.
Lianie se dagboek vir volgende jaar is ook reeds oop, en diegene wat haar vir ’n vertoning wil bespreek sal moet spring. Skakel gerus vir Barry Lubbe op 079 149 3168 of stuur ’n e-pos aan info@lianiemay.com.