FOTO: ’n Skermgreep uit die musiekvideo | Verskaf
Die manne van DZL skop die lente me ’n nuwe enkelsnit, wat sentreer rondom ’n nuwe begin, af. Bloei, ’n duet met Kaylee, fokus op die boodskap dat dit menslik is om te val en foute te maak; die oorwinning lê egter daarin om weer op te staan en nuut te begin.
“Ek is seker almal het al gehoor dat die beste raad vir ’n sweer is om dit oop te maak sodat dit bloei en gesond kan word. En dit is presies die boodskap wat ons met Bloei wil uitdra; ons almal is soms te trots om te erken dat daar goed in jou lewe is wat seermaak en die feit dat jy daaroor kan oopmaak en praat bring eintlik die genesing,” verduidelik Andries Potgieter.
Bloei is die eerste snit op DZL se nuwe album, Realiteit. Die liedjie uit die bekroonde liedjieskrywer, Rouxan Cloete se pen, is ’n inspirerende inleiding vir die res van die album, wat ’n storie oor die manne se lewenspad vertel.
“Ons elkeen ondervind seer op ’n daaglikse basis; of dit nou armoede, verwerping, mishandeing, onsekerheid of mislukking is, niemand is daarvan gevrywaar nie. Die fout wat ons maak is om dit te probeer weg te steek asof ons geen probleme het nie. Erken jou pyn en bevestig saam met ons jy het gebloei, is nou skoon en is gereed om in hierdie nuwe seisoen te juig, te lewe en gesond te wees,” gesels Andries verder.
“Ons tweede album bestaan uit ’n kombinasie van opgewekde deuntjies en ook hartroerende ballades. Bloei is een van die ballades wat sommer dadelik met jou hart praat en ons het al soveel terugvoer van die publiek gekry wat die lied gehoor het dat dit hulle gunsteling op die album is. Ons hoop ook dit raak elkeen se hart wat die lied hoor en die video sien,” vertel Wiaan Fourie.
Die nuwe enkelsnit word op Maandag, 17 September 2018, op radiostasies regoor die land bekendgestel en die musiekvideo ook dieselfde dag eksklusief op SABC 2 se Kliphard.
Jy kry ook die geleentheid om nou eksklusief, en net vir vandag, na die snit gratis aanlyn te luister: