FOTO: Francois Olivier
Drie jaar nadat die sanger en liedjieskrywer, Joe Foster, sy Ghoema-bekroonde album Hartklank vrygestel het, doen hy dit weer.
Hy vat as’t ware die ‘volgende stap’ met hierdie nuwe album. Alhoewel hy gedurende die twee albums reeds talle liedjies en projekte aangepak het, het hy gevoel dat die tyd nou reg is vir ’n volgende album.
Twee van die dertien liedjies op die album is reeds vrygestel en goed ontvang deur die publiek. Vrede Maak en Look Away, Joe se eerste Engelse snit, het sedert die uitreiking daarvan gereeld op treffersparades gekuier. Hierdie twee snitte is ’n lusmaker van wat aanhangers van die nuwe album kan verwag, wat vroeg in Augustus vrygestel word.
Aanhangers kan ook solank gereed maak vir Joe se volgende enkelsnit. Die snit, wat ook die titelsnit van die nuwe album is, is ’n lekker pop-dans liedjie wat verliefdheid en die stappe wat ons saam met mekaar wil vat, uitbeeld. “Ons wil altyd dieper beweeg in intimiteit met mekaar. Volgende Stap dryf daardie emosies wat so sterk navore kom wanneer ons saam met ons beter helftes is,” vertel Joe.
Joe Foster het naam begin maak as solo-kunstenaar met die uitreiking van Pad Na Jou Hart wat vrygestel is as sy eerste enkelsnit van sy Afrikaanse debuutalbum, vroeg in 2014. Dit na hy einde 2013 die groep ADAM verlaat het, om sy solo loopbaan af te skop en begin werk het aan sy Hartklank album.
Pad Na Jou Hart se temalied en enkelsnit projek was ’n goeie fondasie om sy blink loopbaan op te bou. Daarna het hy van krag tot krag gegaan, talle treffers geskryf vir homself, verskeie TV-kanale en selfs vir ander kunstenaars liedjies gepen. Vyf jaar later doen hy dit nogsteeds.
Joe het al die liedjies op hierdie album self geskryf en sê dat hy met elkeen se inhoud en met elkeen se styl baie uit sy gemaksone beweeg het. Hy het selfs sy kletsrym skoene aangetrek op die liedjie As Die Mure Val.
Al die snitte op die album is self deur Joe vervaardig, opgeneem en gemeng. Look Away is deur Fred den Hartog, van die gewilde Heuwels Fantasties-faam, vervaardig en deur Dane Taylor gemeng.
Joe het sy klank, ingenieurswese en musiek-vervaardiging kwalifikasies in Amsterdam, Nederland voltooi, waarna hy terug gekeer het na Suid-Afrika en baie agter-die-skerms ervarings opgebou het voordat hy deel geword het van die groep ADAM.
In die groep het hy meer gefokus op sy toer, skryf en optree kuns en om dit sterk te ontwikkel. Hy het dus minder tyd in studio begin spandeer, maar kort na sy wegbreek van die groep het hy as solo-kunstenaar baie meer daarop gefokus om weer voltyds in die studio te wees, as hy nie op die pad was met optredes en bemarking nie.
Hy het hierdeur goeie selfvertroue opgebou voor hy hierdie projek aangepak het. Joe kon met hierdie album al die individuele lesse, kennis en ervaring implementeer wat hy oor die laaste 10 tot 15 jaar van sy lewe aan spandeer het.
Joe is baie opgewonde oor alles wat hy geleer het met die maak van die album, dat hy sommer dadelik weer gaan begin werk aan nuwe liedjies, terwyl hy natuurlik die Volgende Stap album vrystel en bemark landwyd. “Om ’n album te maak, vat baie lank,” sê hy. Dit is ’n lang proses van inspirasie en implimentasiem, maar Joe is ongelooflik trots op die eindproduk.
Die album is in verskeie plekke oor die land opgeneem en gemeng. In sy eie studio, professionele studio’s, slaapkamers, sitkamers en selfs strandhuise reg oor die land. Volgende Stap is opgeneem waar hy ’n rekenaar, mikrofoon en studio-gereedskap kon opstel en inspirasie vind. Dit is wat hierdie projek werklik iets uniek en spesiaal vir hom as kunstenaar, liedjieskrywer en vervaardiger maak.
Volgende Stap is beslis Joe se ‘volgende stap’ in sy kreatiwiteit en musikale seisoen. Kyk gerus uit vir die album vroeg in Augustus by jou naaste musiekwinkel of digitaal op iTunes en JOOX.
Die album word ook tydens ’n bekendstellings-funksie vrygestel in Pretoria by die Rockwood Teater. Kaartjies hiervoor kan nou bespreek word.
