FOTO: Verskaf
Die 19-jarige sanger en liedjieskrywer van Tzaneen, Hanco, het onlangs ’n platekontrak by die gewilde platemaatskappy David Gresham geteken.
Boonop spog hy nou ook met sy debuutenkelsnit Ek en Jy, wat hy self gepen het. Die liedjie, wat deur Ziggy vervaardig is, gaan oor die oomblik wanneer jy jou beter helfte vas hou en veilig laat voel.
“Dit is vir my ’n groot voorreg om my enkelsnit, Ek en Jy vry te stel. Ek hou daarvan om oor my eie lewenservarings te skryf en dit is hoekom Ek en Jy vir my so belangrik en spesiaal is,” vertel Hanco.
Luister hier na ’n voorskou:
Hanco woon tans in Pretoria en sy eerste kennismaking met die verhoog was op die ouderdom van nege. Die hande klap van die gehoor is ’n herinnering wat hom vir altyd sal bybly.
Vir die afgelope vier jaar het hy ook sanglesse by Rocking Voices geneem en is ’n student in sy finale jaar by SAMI (South African Music Institute) waar hy in komposisie, klavier en teorie spesialiseer. Hanco hou daarvan om sy eie liedjies te skryf en vir hom is die beste gevoel om te sien hoe ’n gehoor op sy liedjies reageer.
Ek en Jy is nou digitaal beskikbaar op Apple Music, iTunes, Spotify, Deezer en JOOX.