FOTO: Verskaf
Die groep Gevoel van Veiligheid, het die afgelope twee tot drie jaar tyd in Ruan Graaff se ateljee spandeer om hul nuwe album Man in die maan, te voltooi.
Die titelsnit van die album is ook hul splinternuwe enkelsnit, wat 20 Julie aan die publiek bekendgestel word. Volgens ’n mediaverklaring reik die groep juis die enkelsnit op 20 Julie uit omdat dit ook die dag is waarop Neil Armstrong vir die eerste keer op die maan was.
“Man in die maan vat jou terug na jou kinderdae, toe ons nog in die eenvoudige dinge in die lewe kon glo,” vertel Deon Roos, een van die groeplede.
Gevoel van Veiligheid is in 2011 gestig as ’n akostiese duo. Aan die einde van 2011 is hul eerste enkelsnit Skaterlag uitgereik op die destydse MK-kanaal. Sedert die uitreiking het hulle ’n verhoog met talle Suid Afrikaanse musikante gedeel, nog sewe enkelsnitte uitgereik, ’n paar keer op die kleinkassie verskyn en ’n breuk gevat om hul album te voltooi.
Oor die musiekvideo, wat deur Dewald van EIE Animations vervaardig is, skerts hulle: “Ons wou maan toe gaan, sonder om ons spaargeld te blaas. Ons het dus Dewald se hulp ingeroep en hy het ons veilig op die maan gekry.”
Die video vertel die storie van hoe ’n seun en sy pa aand na aand na die sterre en die maan kyk. Na sy pa oorlede is, het die seun gedroom om eendag maan toe te gaan omdat hy geglo het sy pa is daar. Hoe dit eindig sal jy self moet sien.
Kyk die video hier:
Gevoel van Veiligheid se nuwe album word 15 September by Railways Cafe in Centurion bekendgestel.