FOTO: Verskaf
Die room van die Afrikaanse musiekbedryf gaan binnekort jou voete laat jeuk en tiekiedraai. Dalk nog die tango laat smeul of sommer net laat langarm-skoffel.
Jonk in Afrikaans is ’n musikale pop-sokkie ekstravaganza, wat dié lente, in samewerking met Carnival City Sun International aangebied word.
Dit gaan beslis nie die tradisionele vorm van ’n konsert aanneem waar jy op ’n harde stoel sit, terwyl jou voete eintlik die riel wil dans nie – dit is ’n jolifikasie van ’n heel ander stofasie.
Visuele effekte, skouspelagtige beligting en dan daardie “room” wat deesdae die sosiale medialandskap oorheers.
Elvis se Seun, Franja du Plessis, Chane Valentine, Dirk van der Westhuizen, Juan Boucher, Tussen Sterre, Irene-Louise van Wyk en Heidi is almal op die spyskaart. Hulle is jonk, talentvol en tonne moderne, oorspronlike dans- en popliedjies.
“Ons het navorsing gedoen en besef dat dié agt nuwe generasie kunstenaars van die publiek se gunstelinge is. Dié sangers is ook van die voorlopers op sosiale media,” vertel die organiseerders van die konsert.
Die idee rondom die konsert het by twee jong entrepreneurs ontstaan. Dié twee gaan kyk gereeld na groot konserte en is verslaaf aan Afrikaanse musiek. Hulle het ’n gaping in die mark vir “iets jonk en vars” geïdentifiseer en daarom gaan die konsert op nuwe, opgewekte Afrikaanse dans- en sokkie musiek fokus.
“Dit gaan nie ’n tipiese Afrikaanse konsert wees waar elke kunstenaar twee of drie van hulle bekendste liedjies gaan sing nie – daar gaan duette en nog ander verrassings wees,” voeg die organiseerders by.
“Ons glo dat die konsert nie net die jonger generasie se voete gaan laat wikkel nie, maar almal wat hou van dans in Afrikaans”
Jonk in Afrikaans word op 20 Oktober 2018 by die Big Top Arena by Carnival City Sun International aan die Oos-Rand aangebied.
Die konsert is sowat drie ure lank. Daar gaan ook sitplekke wees vir diegene wat eerder net na die kunstenaars wil kyk en na die musiek wil luister.
Kaartjies is by Computicket beskikbaar en wissel tussen R120 en R150.