FOTO: Facebook
Die bekende en sekerlik een van die grootste kuierplekke in Pretoria, Weiveld, gaan ruk en rol eerskomende Vrydagaand, 13 Julie 2018!
Daar is groot opwinding in die lug want die baie gewilde Jay tree op met die voorvertoning wat deur die Sommer-sangeres, Geraldine Scholtz behartig sal word.
Wat egter vir addisionele opwinding sorg is dat die nuwe amptelike Weiveld Tune ook eerskomende Vrydagaand bekendgestel sal word!
Wie die sanger is wat dié nuwe liedjie gaan sing wil Rex van Deventer, venoot van Weiveld, glad nie sê nie: “Dit is ’n baie groot geheim, maar wat ek wel kan sê is dat mense weggeblaas gaan word! Dis anders en nuut en die liedjie pas Weiveld soos ’n handskoen. Die gehoor is in vir ’n lekker verrassing,” sê hy opgewonde.
Die liedjie sal eksklusief op Weiveld Tunes Vol. 3 wees wat later vanjaar uitgereik sal word. Weiveld Tunes Vol. 2 het gedurende 2017 goue status bereik.
Toegang kos R80 per persoon. Weiveld is geleë op die Hoek van Graham en Boschkop, Zwavelpoort, Pretoria Oos.