FOTO: Verskaf
Die sanger Wikus Botma het onlangs sy jongste enkelsnit, Afstand Tussen Jou En My, bekend gestel.
Die liedjie wat die storie vertel van hoe kunstenaars hul geliefdes moet agterlaat wanneer hulle gaan toer, is geskryf deur Wikus self, Zanda Traut en Monica Maree. “Ek wil graag hê luisteraars moet hoor dat die lewe op die pad nie altyd so wat wonders is nie. Elke keer wat ek in die kar moet klim en my geliefde agter laat, is dit maar moeilik om so alleen op die pad te wees. Ek weet ek is nie die enigste persoon wat deur dit moet gaan nie, so ek glo meeste luisteraars sal by hierdie lied kan aanklank vind,” sê die sanger.
Wikus meen hy het juis op die snit besluit as sy volgende enkelsnit omdat so baie mense aanklank daarby sal vind. Hy vertel: “Ek het aan die konsep vir die lied gedink toe ek vêr moes ry na ’n vertoning toe ek my geliefde agter moes los. Ek, Zanda en Monica het saam aan die lirieke geskaaf en toe het die melodie en lirieke so mooi bymekaar gekom, ek moes hom so spoedig moontlik vrystel, vir die wêreld om te hoor.”
Hy beskryf sy musiekstyl as pop/rock en bring gereeld ’n akoestiese klank by vertoning in. “Ek is ’n groot aanhanger van akoestiese ballades,” verklap Wikus.
En waarom moet jy die snit aanskaf? “Dit is ’n lekker up beat liedjie wat jy enige tyd en enige plek kan luister. Die lied sal jou ook baie beter laat voel as jy hom luister terwyl jy alleen op die pad is. As jy wil, kan jy lekker op hom dans ook.”
Die musiekvideo, wat van die Kaap tot in die Paarl verfilm is, verduidelik presies waaroor die liedjie gaan. “Ons het baie natuurtonele ingesluit omdat ons wou uitbeeld hoe pragtig ons land is,” verklap Wikus. Daar is ook dele waar Wikus en Shané (die medester in die musiekvideo) na mekaar hardloop en mekaar omhels. “Die heel laaste stukkie van die video wys hoe ek weer alleen stap. Die ontmoeting met Shané was alles maar net ’n dag droom waaraan ek vas hou tot dat ek weer veilig by die huis kan wees,” verduidelik hy.
Kyk die musiekvideo hier:
Benwens vertonings en naam maak in die Afrikaanse musiekbedryf is Wikus en sy mede-skrywers druk besig om nuwe musiek te skryf, wat later vanjaar verwag kan word.