FOTO: YouTube skermgreep
Die boerseun sanger, Rider, het onlangs sy eerste enkelsnit Plaas Spore, wat nie net ’n goedvoel treffer is nie, maar ook ’n persoonlike blik op sy liefdeslewe bied, vrygestel.
Plaas Spore, wat ook op Rider se EP, Grondpaaie beskikbaar is, is deur Pierre Rossouw geskryf. Volgens Rider het hy op die liedjie besluit omdat dit na aan die hart lê. “Plaas spore het van my vriende en familie die vinnigste gegryp en die lied het baie met my persoon te doen,” vertel hy.
Rider sê dat die liedjie ’n boodskap van hoop sal oordra. “Plaas Spore se boodskap is wel dat ons almal verlore liefde iewers ervaar en dat jy net moet dans en deur dit alles glad nie ophou om te glimlag nie”
Rider, oftewel Devon de Villiers, is tans 22 jaar oud en woon in Kaapstad. Sy passie vir musiek het reeds van kindsbeen af begin toe hy die klavier en kitaar baas geraak het. Liedjieskryf het sommer vinnig gevolg.
“Oor die jare heen het my eie lewenspad op en af gegaan, goed en sleg, maar met dit alles saam het my liedjieskryf-materiaal net versterk in so mate dat dit nou tot op ’n punt gekom het waar mense nie net my musiek geniet nie, maar ook werklik na die woorde luister en dit ter harte neem en hulle eie maak,” sê die sanger.
Hy beskryf sy musiekstyl as opskop Afrikaans met ’n tikkie rock en meen dat elke liedjie op sy EP iets anders is met ’n vars unike styl.
Diegene wat hul hart wil verloor op musiek of net ’n vinnige braaipartytjie of wil gaan jag sal aanklank vind by die liedjie.
En met ’n sterk liedjie moet daar ook ’n sterk musiekvideo wees, of hoe? Rider en so ’n paar van sy vriende het die musiekvideo self geskiet. “Die video doen baie goed, en mense is mal oor hom. Dit beeld my regte plaasbloed en die goeie ou dae van ouskool liefde uit,” sê hy.
Kyk die video hier:
Grondpaaie is Rider se debuut-EP met ses liedjies op. Van iets vir die braaivuur tot ietsie vir die siel. Aanhangers sal ook in hul skik wees om te hoor dat ’n volledige album met twaalf liedjies einde Oktober die winkelrakke sal tref.
Tussen al die musiek maak en optree studeer hy ook om ’n veldgids te word.