Stèfan Bezuidenhout binnekort op almal se lippe

Stèfan gaan binnekort op almal se lippe wees. FOTO: Daniel Craig Johnson Photography

Onthou byvoorbaat die naam Stèfan Bezuidenhout. Die 11-jarige van Pretoria gaan binnekort op almal se lippe wees, wanneer sy debuutalbum die winkelrakke tref.

Stèfan is tans ’n gr. 6-leerder aan die Laerskool Wierdapark. Nadat hy ’n sangkompetisie toe hy slegs nege jaar oud was, sing hy nou saam met bekendes soos Bobby van Jaarsveld, Karlien van Jaarsveld, Leah, Tarryn Lamb en Willem Botha.

Verlede jaar het die jong sanger ’n video op sy Facebook-blad gelaai waar hy Shawn Mendez se Mercy op ’n kalwerbord speel en sing. Die video is al meer as 1 miljoen keer gekyk en meer as 8 000 keer gedeel.

“Ons het glad nie gedink die video gaan soveel aftrek kry nie. Ek het sommer die video met my selfoon by die huis geneem,” het Dewald Bezuidenhout, Stèfan se pa, onlangs aan Maroela Media vertel.

Stèfan werk op die oomblik aan ’n Afrikaanse liedjie. Hy het ook verlede jaar opgtree tydens Classics is Groot en sal vanjaar weer by Classics wees op 9 Junie. Verder is hy tans ook in die ateljee om te werskaf aan sy album wat binnekort op die rakke sal wees, nadat dit aangekondig is dat hy deel van die Coleske Artist-span is. Hy verklap dat hy liedjies saam met Karlien van Jaarsveld en Amira gaan sing.

Hier is ’n voorsmakie van sy album:

Volg gerus vir Stèfan op Facebook en Instagram vir die jongste verwikkelinge.