Van 2007 sing hierdie 24-jarige tweeling van die Noord-Kaap, akoestiese weergawes van ou bekende gunstelinge uit verskeie genrés wat wissel van pop/rock en country, tot gospel, Afrikaans en enige iets tussen in.
Melissa en Corrie Munnik deel nog altyd ’n liefde vir musiek, maar kon eers later in hul lewe ’n groep stig met die hulp van Port Nolloth se eie country-ster Magda De Waal, sowel as boeremusiek legende Cyril Swart.
Ten spyte van dié broer en suster se serebrale gestremdheid, speel Corrie vandag uitstekend kitaar en het hy en Melissa voortgegaan om hul passie uit te leef, maar ’n sangloopbaan gebeur nie oornag nie.
Na 8 jaar in wording, kry MC2 uiteindelik hul eerste amptelike optrede voor die publiek op die hoofverhoog van iStart2Sing se musiekfees vir diversiteit. Die geleentheid was aangebied deur Die Nasionale Raad vir Mense met Liggaamlike Gestremdheid in SA (NCPPDSA) op 31 Mei 2015 by Constitution Hill in Braamfontein, Johannesburg. Dit het vir Melissa en Corrie ’n artikel op bladsy 3 van die volgende dag se The Star koerant losgeslaan.
Daardie selfde jaar het MC2 ook in Die Plattelander koerant verskyn, nadat die NCPPDSA hulle betrek het by nog een van hul inisiatiewe: om vir Jannie du Toit te open tydens sy Kerskonsert in Springbok op 19 Desember, vir die ontwikkelingswerk vir mense met gestremdhede in Namakwaland. Jannie het vir MC2 ontmoet terwyl hy ook by iStart2Sing opgetree het, aangesien hy dikwels by liefdadigheid betrokke is.
Onder leiding van Pendle Pro het Melissa en Corrie se debuutalbum, eenvoudig net getiteld MC2, in 2017 die lig gesien. Die liedjies daarop laat mens nostalgies voel, maar het ’n vars nuwe klank danksy die talent van hul musiekverwaardiger, Quinten Pendle. Hy wat self blind is, sê niks moet hulle terughou om 100% voluit met hul musiek te gaan nie. Hy glo daar is ’n plek in die mark vir MC2 en praat net met lof oor hul skryfvermoë.
Luister hier na hul weergawe van Sonvanger:
Laastens is dit Melissa en Corrie se doel om ander te inspireer deur hul prestasies.