Martin Bester wil graag hê almal moet weet hoe ernstig hy oor sy sangloopbaan is. Hy is ’n man van vele talente, maar musiek vloei deur sy bloed. Hy is nie net ’n bekroonde radio-omroeper, televisieaanbieder, akteur en seremoniemeester nie, maar ook ’n musikant in murg en been.
Sy nuwe enkelsnit is pas vrygestel en beloof om in die suksesvolle voetspore te volg van sy bestaande treffers, Wat weet ek tog, Ou Spoor en Sterre. Ek het geweet is een van daardie liedjies wat jou voete laat jeuk om te dans, met ’n wysie wat onmiddellik in jou kop kom vassteek en jou uitnooi om lekker saam te sing. Die sanger beskryf dit as ’n popliedjie met ’n punk-rock aanslag.
Luister hier na ’n voorskou van die liedjie:
“Ek hou van eerlike mense wat reguit is oor hul gevoelens. Niemand het tyd vir speletjies speel nie en dit is waaroor die liedjie gaan. Dit het ’n opgewekte deuntjie en is iets waarmee almal kan vereenselwig,” sê hy. “Ek wil hê my liedjies moet mense raak en dat hulle dit van toepassing moet maak op hulle eie lewens. Ek love dit as my musiek met iemand ‘praat’ op die dansvloer, op ’n road trip in die kar of selfs net alleen by die huis.”
Oor die musiekvideo wat binnekort verfilm word kan hy nog nie veel verklap nie, maar sê wel dat hy dit graag op die dak van ’n gebou sal wil skiet, met die son wat in die agtergrond sak.
Musiek was nog altyd deel van Martin se lewe, van die skoolkoor tot sy eerste musiekgroep op Universiteit en die wat daarna gevolg het. Hy is een van die bekendste radiopersoonlikhede in die land en spog met toekennings vir Beste Middagprogram-omproeper, asook ’n Huisgenoot Tempo-toekenning vir Radioomroeper van die Jaar. Die kunstenaar was al aanbieder van verskeie televisieprogramme en het ook klein rolle gehad in Afrikaanse rolprente soos Pretville, Vrou Soek Boer en Sonskyn Beperk.
Kinky Robot, die groep waarvan hy die hoofsanger is, is benoem vir ’n SAMA en sy debuut solo-album, Vir Die Eerste Keer, is van die begin af goed ontvang. Die lirieke van Hobie Beach, Kinky Robot se eerste enkelsnit, is ook onlangs ingesluit in ’n Engelse handboek vir graadelfs. Sy werk neem hom gereeld na groot verhoë, funksies en feeste regoor die wêreld soos die KKNK, Innibos en Hammersmith Apollo in Londen. Hy was ook al deel van verskeie groot geleenthede, wat die Inhuldigingseremonie van die 1995-Springbokke en Mandela in die SA Sportheldesaal, die London goes SA-konsertreeks, 2010 Sokkerwêreldbekergeleenthede, die Ghoema-, Pendoring- en SAMA-toekennings en die Titans Krieketunie se liefdadigheidsbal, insluit.
As jy hom vra waar hy die inspirasie vir sy liedjies vandaan kry, sê hy: “Dit kom van alledaagse dinge, soos wat ek dit sien, hoor en beleef. Partykeer tref ’n idee my as ek na die wolke kyk of hoe die wind op ’n stofpad waai. Die afgelope paar maande het ek baie geskryf soos wat goed gebeur het.”
As musikant, het hy groot waardering vir ’n wye verskeidenheid musiek, wat wissel van Queen tot Theuns Jordaan en U2 tot Francois van Coke. Die musiekbedryf het vir Martin Bester geleer dat dit belangrik is om net jouself te wees, al vat dit mense langer om jou te verstaan, maar gelukkig het hy dit reggekry om sommer uit die staanspoor die harte en ore van die publiek te verower.
Ek het geweet is ’n lekkerluistertreffer wat beslis gaan koning kraai op die dansbaan en radiotreffersparades, waarsonder geen partytjiespeellys volledig sal wees nie.
