As daar nou een sanger is wat geen bekendstelling in die musiekbedryf nodig het nie, dan is dit Adam Tas. Die besonderse manier waarop hy sy sielvolle sentimentele lirieke en pragtige rasperstem saamweef, is hoendervleismooi en het die afgelope paar jaar van hom volksbesit gemaak. Dit is daarom geen verrassing dat hy onlangs deur Universal Music genader is om deel te word van hulle wenspan nie.
Hy sluit aan by ’n lang lys bekende en suksesvolle kunstenaars, waaronder Willem Botha, Caroline Grace, Fatman, Early B en vele meer, wat ook deel is van hierdie internasionale musiekmaatskappy. “Dit is lekker om in ’n verhouding betrokke te raak by ’n maatskappy waarby beide die kunstenaar en die besigheid gelyke voordeel kan trek uit ’n produk. Na vele oorweging om self ’n album te vervaardig of nie, was die aanlokliheid van ’n gelyke voordeelaanbod vir my die beste uitweg,” sê die musikant oor dié geleentheid wat hom te beurt geval het.
Alhoewel sing nie deel was van sy oorspronklike toekomsplanne nie, het ’n groot fietsongeluk sy paaie met sy regte lewenspassie laat kruis. Van daar af het hy aan sy loopbaan begin bou en het selfs vir hom ’n plek losgesing in die Guinness Book of Records toe hy op 41 verskillende plekke opgetree het binne 24-uur. Sy diep stem, unieke klank en warm verhoogpersoonlikheid het dadelik aanklank gevind by gehore van alle ouderdomme en sy musiek is goed ontvang deur radiostasies regoor die land.
Agt suksesvolle albums (Memories In ’n Menthol, Springbok Radio, Ben Bicycle, Storm van Liefde, Man van Stof, Want jy is Boer, ’n Tas vol Cash en Patatas en Pyptabak wat gouestatus bereik het) en verskeie radiotreffers later, waaronder Gaan Sê Vir die Angles, ’n Man Soos My Pa, Draadloos Dae en vele meer, het hy een van die gewildste sangers in die land geword en al die verhoog gedeel met van die beste plaaslike talent. Adam het ook al opgetree by van die grootste konserte en feeste in die land, waaronder Huisgenoot Skouspel.
Wanneer hy nie op die verhoog is nie, is hy besig om sy vlerke te sprei as televisiepersoonlikheid en was hy al aanbieder van twee groot kykNET-programme, Woema en Wild en Wragtig. Hy is ook een van die hoofkarakters in die fliek Spook van Uniondale saam met André Swartz, Ivan Zimmermann en Tobie Cronjé en sy enkelsnit, So Verlief, was deel van die fliek, Vrou Soek Boer, se klankbaan. As gekwalifiseerde wildbewaarder, stel Adam baie belang in wildteling en geniet hy die natuur en boogjag.
As jy hom vra wat sy planne vir die jaar is, verklap hy: “My planne vir 2018 is om ’n nuwe album te skryf en vry te stel. Dit is immers nou al ’n paar jaar laas wat dit gebeur het. Ons bring ’n groot plaat, onbeskaamd vir die boere en in Afrikaans, klaar gepraat.”
Universal is baie opgewonde oor die vooruitsig om saam met Adam Tas te werk en beplan groot dinge vir hom in die toekoms. “Afrikaanse musiek lê ons na aan die hart en dit is altyd opwindend om ’n pad te stap saam met ’n besonders talentvolle kunstenaar, wat so baie het om te bied,” sê Christien de Klerk, die maatskappy se Skakelbestuurder vir Afrikaanse Kunstenaars.
