Nadat Afrikaans is Groot reeds ’n ekstra vertoning vir hul Kaapstad-aanbiedings op 16 Maart bygevoeg het, is die vraag na kaartjies stééds oorweldigend. Die konserte vir 17 Maart is beide tjokkenblok en kaartjies vir 16 Maart se konsert is besig om vinnig opgeraap te word.
Die organiseerders het dus besluit om vir die eerste keer ooit ’n vierde Afrikaans is Groot konsert in Kaapstad te aan te bied.
“Kaartjies vir die vertonings verkoop beter as enige jaar van tevore. Dié tyd laas jaar het ons nog ses maal soveel kaartjies gehad as wat ons tans oor het,” vertel Brendon Hargroves, uitvoerende vervaardiger van Afrikaans is Groot.
Die vierde vertoning word op Sondag, 18 Maart om 13:00 aangebied by die Grand West se Grand Arena.
Konsertgangers kan uitsien na optredes deur Steve Hofmeyr, Juanita du Plessis, Bobby van Jaarsveld, Theuns Jordaan, Karlien van Jaarsveld, Jay en nóg vele verrassings.
Ongeveer 85 000 konsertgangers woon Afrikaans is Groot in Pretoria by, wat dit die grootste musiekproduksie in Suid-Afrika maak. Maar die vierde Afrikaans is Groot-konsert bewys dat Afrikaans beslis nog nooit só groot soos nou in Kaapstad is nie.
Kaartjies vir die ekstra vertoning is nóú by Computicket, Money Market-kiosks, Shoprite/Checkers en House & Home landwyd beskikbaar. Kaartjies is ook aanlyn by Computicket of by 0861 915 8000 beskikbaar