Vyftien jaar nadat Kurt Darren die Afrikaanse musiekmark gestormloop het, wéét die onbetwisbare koning van Afrikaanse dansmusiek steeds hoe om die planke behoorlik te laat wip.
Sy nuwe album, Laat Die Dansvloer Brand, bestaan uit 14 snitte wat daai fyn balans tussen lekker opskop-sokkie en rustig dans presies regkry.
Snitte soos Warrelwind se kind, Jy’s ’n legend, Fluit fluit, Gravitasie manipulasie en die titelsnit is by uitstek gerat vir ’n behoorlike skoffel, met ’n gesonde mengsel van pop, rock, ’n bietjie van ’n techno-ondertoon en ritmes met tonne skop wat dit duidelik maak dat dié album nie vir uitsitters of draadsitters gemaak is nie.
Rustiger nommers soos Boesem, Alle paaie lei na liefde, Daar vat jy my asem weg en Haal asem dra ’n meer intieme geur, met meevoerende kitaarsolo’s wat per geleentheid bo die ander instrumente uittroon en ’n hart sonder twyfel nog daai ekstra bietjie warmer sal laat klop.
Kurt snoer ook kragte met Snotkop en Leah vir die lekker tong in die kies partytjieliedjie, Selfie song.
’n Treffende duet oor sielsdiepe liefde, Depth of my heart, met Corlea Botha asook sy eie, uitstekende interpretasie van Ed Sheeran se treffer, Perfect.
Laat die dansvloer brand vier die lewe, sy dinge, sy mense en, natuurlik, die liefde. Die album is tonne pret, maar ook diep en sielvol. Dis baie soos ’n goeie wyn: die produk van jare se toewyding tot uitnemendheid – een wat weet hoe om die skerper, meer speelse geure perfek met ’n sagter, meer delikate tekstuur te verenig in iets wat jou sal laat sê: “Dié proe soos nog!”
Kurt Darren se nuwe album is nóú landwyd beskikbaar en ook digitaal op JOOX. Laai dié app gratis in die Google Playstore en App Store af en gebruik die kode Lumico2 om VIP-toegang te kry en klik hier om die album te luister.