Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Danièle Pascal vir één aand by Africlassic River Lodge

Die charismatiese sangeres en skrywer Danièle Pascal vier vanjaar die 40ste jaar van haar solo-loopbaan in die vermaaklikheidsbedryf en tree op Vrydag, 10 November by Africlassic River Lodge in Rivonia, Johannesburg op. Kaartjies vir die opvoering beloop R290 per persoon en sluit ’n driegangete in.

Dié bekroonde vermaaklikheids-ikoon spog met ’n lang lys loopbaanhoogtepunte – van haar verhoogdebuut op vyfjarige ouderdom tydens haar kinderjare in Toulon, Frankryk, tot haar optrede in verskeie verhoogproduksies in die VSA en Kanada, en haar vriendskap met oorlede Leonard Cohen, met wie sy tydens haar tydelike verblyf in Kanada opgetree het.

Pascal woon sedert 1985 in Suid-Afrika en word erken as ’n gerekende teater-veteraan wat haar merk gelaat het in die bedryf. Haar musikale voordrag en optreestyl het sedertdien verskeie plaaslike vermaaklikheidspersoonlikhede geïnspireer.

Haar repertoire is bykans so wyd soos haar prestasies. Wees voorbereid op invloede van Edith Piaf, Jacques Brel, Peggy Lee, Eartha Kitt, Marlene Dietrich, kabaret, musiekteater, Franse kafee-liedjies en jazz, asook klanke van Bertholt Brecht, Kurt Weill, Federico Garcia Lorca, Marianne Faithfull en Leonard Cohen.

Africlassic River Lodge is sentraal geleë in Sandton en maklik om te bereik. Die venue is op die oewers van die Braamfontuin Spruit en is welbekend onder gereelde besoekers vir gehalte-uitvoerings deur bekende kunstenaars en die aanbieding van hul gourmet-maaltye, met ’n ‘Africlassic’- invloed.

Die tyd vir die opvoering is 18:30 vir 19:00. Kaartjies is beskikbaar by Computicket, of skakel gerus Africlassic River Lodge by 011 234 6522, of stuur ’n e-pos na branding@africlassic.com om ’n bespreking te maak.