Monique Steyn word ongetwyfeld as een van ons land se top vroulike kunstenaars beskou, met ’n stem wat nie vir niemand hoef terug te staan nie. Haar jongste album, Mosaïek, het pas die winkelrakke getref en aanhangers is reeds aan’t gons!
Monique se debuut-album, Ek val vir jou, het die lig gesien in 2011 en vinnig goue status bereik. Sy was ook deel van die groep, 4Werke, wat platinumstatus agter hul naam geskryf het. Nou is sy terug met ’n meer volwasse klank – eie aan wie sy is.
Meeste van die snitte op die album is deur die bekroonde skrywer, Johan Oberholzer, gepen. Johan is ook ’n goeie vriend van Monique. Dié twee het nou saam gewerk om die album so persoonlik as moontlik te maak. Coleske en die vervaardiger, Paulo Azevedo, het daarna aan die album geskaaf en skuur om seker te maak kwaliteit word gelewer.
“Ek glo nie daaraan om terug te kyk en jouself te bevraagteken nie,” sê Monique.
“Ek dink die besluite wat ek tot dusver geneem het, die pad wat ek geestelik gestap het, die vriende wat ek gemaak het en daardie oomblikke wat ek in ’n rigting moes besluit, het my gemaak wie ek vandag is.”
Volgens Monique kom al dié besluite soos ’n ‘mosaïek-kunswerk’ bymekaar, al is daar soms krake. Daarom die titel, Mosaïek, meen sy.
Die album bevat dertien snitte waarvan die treffer-duet, Hartseer, met Ruhan du Toit van Touch of Class by die album ingesluit is. Nóg verrassings op die album sluit ’n heropname van, Sweef soos ’n arend en ’n pragtige duet, ook met Ruhan, The Prayer in.
Alhoewel die album ’n meer volwasse klanke en ander sy van Monique vertoon kan aanhangers steeds uitsien na snitte wat die Monique wat ons leer ken het weerspieël.
Die album is nóú landwyd beskikbaar asook digitaal op GrootTunes.
Bly ophoogte van Monique Steyn se loopbaan op Facebook, Twitter en Instagram en gebruik die hutsmerk #Mosaïek om jou gedagtes oor die album te deel!