Liani Reynolds, ’n mamma van vyf seuns het al die pad van Trompsburg tot in Pretoria gery om een van haar drome te bewaarheid.
Sy het onlangs by ’n Eliah-kerkkamp ’n weergawe van Amanda Strydom se lied Pelgrimstog gesing. Die tema van dié kamp was “Jou Skeppings doel” – min wetend dat sy een stappie nader aan haar eie skeppingsdoel sal kom.
Liani was nog altyd ’n sanger in haar hart, van kleins af, maar ná skool het sy arbeidsterapie studeer, en daarna haar meestersgraad in musiekterapie voltooi. Sy het egter na haar studies die droom om te sing laat vaar om klavierlesse te gee.
Soos die noodlot dit wou hê, was Ronel Brink, bestuurder en ma van Bobby van Jaarsveld, ook by die kamp. Sy was onmiddellik weggevoer deur Liani se talent en met haar ervaring in die musiek het sy besef daar is baie potensiaal in Liani se stem.
Ronel het nét daar besluit om vir Liani die geleentheid te gee om op ’n album sing! Liani was egter uit die veld geslaan, en sy het sommer in trane uitgebars het.
“Dit was nog altyd ’n groot droom van my om musiek op te neem, en toe Ronel my genader het, het ek onmiddellik besef hoe groot geleentheid dit is, ek is so dankbaar,” vertel Liani.
Terug van die kamp het Ronel Brink vir Liani ’n spasie op ’n album in produksie bewerkstellig, en Joe Foster, bekende skrywer, sanger en vervaardiger is toe ingespan om Perlgrimstog vir Liani te verwerk.
Liani het 23 Maart spesiaal vanuit Trompsburg deurgery om saam met Paulo Azevedo en Joe Foster in die die ateljee te gaan werk om die snit op te neem.
“Ek is so gelukkig met Joe Foster se verwerking van die lied, dit is presies wat ek sou verwag het. Ek het gehoop dat die liedjie ’n rustige en emosievolle gevoel sou hê en Joe het dit presies vasgevang,” vertel Liani met haar besoek aan Coleske se kantore in Pretoria.
Direk na haar opname is sy weer op pad na Tromsburg waar sy weer ma moet gaan staan vir drie kleintjies en twee groter seuns wat nou besig is met eksamens.
“Hierdie is werklik ’n groot geleentheid, ek sou ook ses ure hiervoor gery het,” vertel Joe Foster.
Liani se weergawe van Pelgrimstog sal op Gospel Tunes Volume 1 beskikbaar wees, wat digitaal op GrootTunes vrygestel gaan word!