Kaartjies vir die Afrikaans is Groot-konserte in Kaapstad is amptelik uitverkoop! “Ons kan net die publiek bedank vir hul getroue ondersteuning, en ons kan nie wag om hierdie produksie na Kaapstad te neem nie,” sê Arnold Coleske, organiseerder van die konsert.
Afrikaans is Groot maak vir ’n vierde keer ’n draai in die Moederstad. Op Vrydag, 17 Maart en Saterdag, 18 Maart is dié konsert by Grand West Casino in Kaapstad te sien.
Bobby van Jaarsveld, Karlien van Jaarsveld, Jannie Moolman, Corlea, Elvis Blue, Dewald Wasserfall, Lianie May, Steve Hofmeyr, Juanita du Plessis, Jay, Karen Zoid, Laurika Rauch, Riana Nel en Bok van Blerk is almal saam op één verhoog. En natuurlik wag daar ook so ’n paar ander verrassings op konsertgangers.
Afrikaans is Groot is ’n musiekkonsert wat sedert 2012 aangebied word, en beloof jaarliks om nie net iets vir die oor te bied nie, maar ook iets vir die oog. Goeie klank, uitstekende beligting en artistieke toevoegings maak van die konsert ’n trekpleister vir oud en jonk.
“Die Afrikaanse gemeenskap in die Kaap is baie lojaal teenoor Afrikaanse musiek, daarom het ons besluit om die konsert ook daar aan te bied,” sê Coleske verder. Volgens Coleske is hierdie nie net ’n konsert nie, dit is produksie wat Afrikaanse musiek vier.
Diegene wat reeds die konsert in Pretoria bygewoon het, is vol lof. Clara Smit skryf op Facebook: “Ek was daar, dit was pragtig en die kostuums was asemrowend.”
Debbie Ferguson Schoultz het van haar laat hoor, en vertel: “Ons was daar en dit was ongelooflik, sal definitief weer volgende jaar bywoon.”
“Mense, dit is ’n belewenis. Gaan definitief weer volgende jaar,” skryf Nana Swart Abrie.
Afrikaans is Groot is Vrydag, 17 Maart om 19:00 en Saterdag, 18 Maart om 13:00 en 19:00 op die planke by die Grand West Casino.
Bly op die hoogte van Afrikaans is Groot-nuus op Facebook en Twitter en Instagram.