’n Nuwe naam het pas sy plek in die Afrikaanse rocklandskap kom opeis. SENTIMENT maak hul amptelike buiging met hul debuut-enkelsnit, “Ek Wil Jou Sien” – ’n kragtige eerste kennismaking met ’n groep wat groot droom, groot klink en nie bang is om emosie sentraal in hul musiek te plaas nie.
SENTIMENT is die kreatiewe samewerking tussen Jako Meyer op sang en Regardt Scheepers op kitaar, ondersteun deur ’n vaste groep sessiemusikante wat die duo se groter rockklank tot lewe bring.
Hoewel SENTIMENT ’n splinternuwe projek is, is Jako en Regardt beslis nie nuwelinge in die musiekbedryf nie. Jako is bekend vir sy betrokkenheid by Moses Metro Man en sy solowerk, terwyl Regardt reeds saam met kunstenaars soos Jesse Clegg, Dominic Neill en Josh Savage gewerk het. Hy was ook betrokke by die Suid-Afrikaanse toer van The Temper Trap.
Met SENTIMENT wil hulle egter nie bloot voortbou op hul vorige werk nie. Die doel is om iets nuuts binne Afrikaanse rock te skep – musiek met die energie en omvang van stadiumrock, maar steeds geanker in sterk melodieë, treffende lirieke en opregte emosie.
“Ons wil graag ’n ‘next level’ Afrikaanse rockband met ’n stadium-rock sound wees; groot kore, met sentimentele musiek,” verduidelik Jako.
Die resultaat is ’n alternatiewe rockklank wat deur ’n sterk ritmeseksie, melodiese vokale en kenmerkende kitaarwerk aangedryf word. Dit is groot genoeg vir ’n verhoog, maar persoonlik genoeg om die luisteraar emosioneel te tref.
Hoewel SENTIMENT nou eers amptelik sy verskyning maak, het die gedagte aan ’n gesamentlike projek reeds jare gelede by Jako en Regardt ontstaan.
Die twee deel ’n liefde vir dieselfde tipe musiek en het lank oor die moontlikheid gepraat om iets saam te skep. Regardt het selfs tydens sy verblyf in Berlyn reeds oor die projek gedink.
Uiteindelik het hul loopbane en tydlyne op presies die regte oomblik bymekaargekom.
“Ons loopbane is nou van so ’n aard dat ons voel die tyd is reg,” sê Jako. “Om eerlik te wees, het dit net een skryfsessie geverg.”
Selfs die naam SENTIMENT het natuurlik ontstaan. Nadat hulle na die nuwe musiek geluister het, was dit die gevoel wat volgens Regardt onmiddellik na vore gekom het. Die naam verwoord die emosionele aard van hul lirieke en klank, maar gee hulle terselfdertyd genoeg ruimte om in die toekoms verder te ontwikkel.
Met hul debuut-enkelsnit, “Ek Wil Jou Sien”, gee SENTIMENT luisteraars die eerste voorsmakie van dié musikale wêreld.
Die liedjie handel oor daardie allesoorheersende liefde waarvoor jy bereid is om enigiets te doen – die een persoon wat jy net wil sien en naby jou wil hê, selfs wanneer dit voel asof alles rondom jou uitmekaar val.
Die liedjie self het besonder vinnig ontstaan. Tydens ’n skryfsessie het Regardt met ’n pakkende kitaarriff vorendag gekom. Jako se eerste woorde, wat spontaan saam met die melodie gevolg het, was eenvoudig: “Ek wil jou sien.”
Binne ongeveer 30 minute was die liedjie geskryf.
“Dit gaan oor die een liefde waarvoor jy enigiets sal doen, net om hulle te sien en by jou te hê tot aan die einde van tyd,” verduidelik Jako.
Vir hom dra die titel ook ’n tweede betekenis. “Ek Wil Jou Sien” verteenwoordig die begin van ’n nuwe musikale hoofstuk en die geleentheid om weer harder Afrikaanse musiek te maak.
Die enkelsnit is in Maart by Johan Viljoen in Potchefstroom opgeneem en kombineer die rou energie van rock met die emosionele kern wat SENTIMENT se naam en identiteit onderstreep.
Hoewel die liedjie uit ’n baie spesifieke gevoel van liefde gebore is, hoop die groep dat luisteraars hul eie herinneringe en betekenis daarin sal vind.
“Die hoop is dat die liedjie mense terugneem na iemand, ’n plek of ’n tyd wat vir hulle belangrik was – en dalk iets wakker maak wat lankal stil geword het,” sê Jako.
Dit is juis dié kombinasie van nostalgie, verlange en groot rockenergie wat “Ek Wil Jou Sien” ’n treffende eerste kennismaking met SENTIMENT maak.
“Ek Wil Jou Sien” is egter net die begin.
SENTIMENT se tweede enkelsnit is reeds opgeneem en sal na verwagting teen die einde van Oktober verskyn. Daarmee maak die groep dit duidelik dat hulle nie bloot met een liedjie hul verskyning maak nie, maar besig is om aan ’n nuwe hoofstuk binne Afrikaanse rock te bou.
Met ervare musikante aan die stuur, groot ambisie en ’n klank wat rock se energie met emosionele storievertelling kombineer, is SENTIMENT ’n naam om dop te hou.
En met “Ek Wil Jou Sien” as hul eerste tree, het hulle hulself op ’n gepaste manier bekendgestel: hard, eerlik en met baie sentiment.
“Ek Wil Jou Sien” is nou op digitale stroomplatforms beskikbaar.