“Die song gaan oor in die oomblik lewe en soveel daarvan maak terwyl ons lewendig is,” vertel Francois van Coke oor sy nuutste enkelsnit, “LEWE”, saam met Zaan Sonnekus.
Dit is presies dié boodskap wat die twee kunstenaars met ’n oorvloed energie in die enkelsnit én gepaardgaande musiekvideo uitbeeld. “LEWE” is hul tweede samewerking nadat hulle in 2023 reeds kragte saamgespan het vir “Almal Baklei”.
Vir Francois is daar iets besonders aan Zaan se onwrikbare toewyding tot musiek – ’n eienskap waarin hy ook iets van sy jonger self herken.
“Ek en Zaan is vriende, maar ek sien ook iets van myself in hom toe ek daardie ouderdom was. Dit is daardie liggaam-op-die-spel, geen-terughou-toewyding tot musiekmaak. Ek dink die song vang daai houding vas,” sê Francois.
Vir Zaan is die geleentheid om saam met een van sy grootste musikale helde te werk ’n volsirkel-oomblik.
“Om saam musiek te maak met iemand wat my geïnspireer het om dit in die eerste plek te doen, is iets wat ek nie ligtelik vat nie. Francois is al my gunstelingkunstenaar vandat ek ’n klein laaitie was, en ek dink hy sal dit waarskynlik vir die res van my lewe bly,” vertel hy.
Volgens Zaan het hy met Francois se musiek grootgeword en gesien hoe dié rocker ’n pad vir Afrikaanse rock oopkap. Om hom vandag nie net ’n vriend nie, maar ook ’n mentor te kan noem, is vir hom ’n surrealistiese ervaring.
Die “dag-in-die-lewe”-musiekvideo vir “LEWE” vang Francois en Zaan se vriendskap, spontane energie en avontuurlustigheid perfek vas. Die twee het onder meer gaan branderplankry, mekaar getatoeëer, met go-karts gejaag en saam met die inwoners van ’n ouetehuis musiek gemaak.
Kyk die musiekvideo hier:
Hulle het selfs by Danie du Toit van Spoegwolf geleer hoe om braaibroodjies te verf.
“Die video was basies ’n paar dae van dinge doen wat ons waarskynlik nog altyd wou doen. Dit het amper minder soos ’n musiekvideo gevoel en meer soos twee vriende wat herinneringe maak terwyl die kameras toevallig aan is,” vertel Zaan.
Die enkelsnit se kunswerk bestaan uit ’n tatoeëermerk wat Zaan persoonlik op Francois se been aangebring het. Francois se tatoeëermerk op Zaan se lyf het egter ongelukkig nie die finale weergawe gehaal nie.
Die musiekvideo is deur Julius Bekker van RFND Photography verfilm en slaag daarin om die rou energie, kameraadskap en lewenslus van die enkelsnit visueel vas te vang.
“LEWE” is nou op alle groot digitale platforms beskikbaar. Aanhangers kan dié energie ook op 9 Oktober 2026 beleef wanneer Francois van Coke & Vriende die SunBet Arena by Time Square in Pretoria oorrompel.