Saterdag 18 April 2026 gaan geskiedenis gemaak word wanneer Liefde by die Dam sy 10de bestaansjaar vier met ’n Super Mega Bonanza by Emmarentia Dam in Johannesburg.
Wat in 2016 begin het as ’n unieke musiekfees – vernoem na Valiant Swart se ikoniese liedjie – het oor die jare gegroei tot een van Suid-Afrika se mees geliefde en uitverkoopte feeste. Met sy kenmerkende lekkergoed-hartjies, wêreldklas verhoogproduksie en ongelooflike atmosfeer, het Liefde by die Dam ’n ware fenomeen geword in beide Johannesburg en Kaapstad.
En nou? Nou word daar GROOT gegaan.
Hierdie 10-jaar viering bring ’n kragtige, uiteenlopende en feestelike line-up bymekaar wat generasies en genres oorbrug. Musieklegendes soos Mango Groove, Fokofpolisiekar en Die Heuwels Fantasties deel die verhoog met moderne gunstelinge soos Will Linley, Appel en Early B.
Die partytjie word verder opgestook deur die unieke energie van Jack Parow en Robbie Wessels, terwyl aKING, Barto, Zoé en Twee sorg vir vars, energieke optredes.
En asof dit nie genoeg is nie, wag daar ook nog ’n rits secret acts in die vlerke. Dis letterlik ’n line-up vir die geskiedenisboeke.
Claire Johnston van Mango Groove deel haar opgewondenheid: “Dit is ons eerste Liefde by die Dam en dit is vir ons baie spesiaal om deel te wees van so ’n geliefde fees se 10-jaar-verjaardag. Dit gaan ’n wonderlike dag wees!”
Francois van Coke lag dat hy “al deel is van die meubels” by Liefde by die Dam. Hy het tot dusver by elk van die tien Johannesburg-konserte opgetree.
“Dit is altyd ’n eer om deel te wees van Liefde se sterk, massiewe, uiteenlopende line-up.”
Pierre Greeff, hooforganiseerder en voorsanger van Die Heuwels Fantasties, sê: “Om Liefde by die Dam oor die jare te sien groei is ’n onbeskryflike gevoel. Dit is ’n voorreg om hierdie ekstra Super Mega Bonanza-verjaardagshow op die planke te sit. Daar is geen keer in hoe groot ons hiermee gaan nie. Ons pull al die stops!”
Kaartjieverkope is vanaf Donderdag 26 Februarie om 08:00. Liefde by die Dam is bekend daarvoor dat kaartjies blitsvinnig uitverkoop – so moenie uitmis nie.
Pryse:
- Algemeen: R399
- Kinders (3–12): R220
- Kinders onder 3: Gratis
- VIP: R2999
Die VIP-ervaring bied prioriteitstoegang, ’n eksklusiewe VIP-area met skaduwee, sitplekke en privaat toilette – plus alle kos en drankies ingesluit. ’n Ware fees in styl!
Kaartjies is beskikbaar by Ticketmaster en via www.liefdebydiedam.co.za.