Tamlyn Wessels, wat reeds die Afrikaanse musiekbedryf betower het met haar treffers soos “Mooier As Mens” en “Klein Bietjie”, is terug met ’n splinternuwe enkelsnit wat beloof om jou reguit op die dansvloer te laat beland! “Nommer Hou” word op 11 Julie 2025 vrygestel – en dis ’n liedjie wat jy nie gaan wil misloop nie.
Met “Nommer Hou” keer Tamlyn terug na die klank wat haar van die begin af gewild gemaak het – daardie onweerstaanbare pop-country geur wat haar musiek laat uitstaan – maar sy bring ook iets vars en nuuts na die tafel. Dis ’n lied wat balanseer tussen eerlikheid en speel-speel, tussen waardes en wense, tussen ritme en romanse.
Kyk die musiekvideo hier:
Die liedjie is in samewerking met die talentvolle Emil Paul geskryf, en weer eens is Hugo Ludik van Muse Studios agter die vervaardiging. Dis dieselfde span wat verantwoordelik was vir die sukses van “Mooier As Mens”, en hulle het weereens ’n goue resep gekry.
“Nommer Hou” vra ’n eenvoudige, maar tog belangrike vraag: Wat moet iemand wees of doen om jou nommer te kry? En as hulle dit regkry – sal jy hulle nommer hou?
Die liedjie dra ’n energieke boodskap met ’n pop-country klank wat jou voete laat jeuk van lus om te dans. Boonop verskyn daar ook ’n stylvolle musiekvideo saam met die vrystelling waarin Tamlyn self haar keuses maak – iets wat aanhangers sal laat terugkom vir meer.
Of jy nou al lank ’n aanhanger is, of Tamlyn se musiek nou eers ontdek – “Nommer Hou” verdien ’n plek op jou speellys. Merk die datum: 11 Julie 2025. En wees gereed – Tamlyn wil jou nommer hou!