Die hoogtepunt van die musiekjaar het onlangs plaasgevind toe duisende mense by Loftus Versfeld saamgetrek het vir die jaarlikse Krone 2024-konsert. Onder die sterre wat die verhoog verlig het, was Appel, die geliefde Afrikaanse sanger en liedjieskrywer. Charmaine van Sing in Afrikaans het die kans gehad om agter die skerms met hom te gesels net voor hy sy opwagting gemaak het.
In sy karakteristieke nederige styl het Appel sy opgewondenheid oor die vertoning uitgespreek. “Ek is in ekstase en ek is baie opgewonde. Ek dink nie dit sal ooit weggaan nie,” het hy gesê met ’n glimlag, terwyl hy voorberei het vir sy optrede voor die groot gehoor.
Hy het ook gedeel dat die kunstenaars hard geoefen het in die week wat die konsert voorafgegaan het. “Ek kan nie glo ons is uiteindelik hier nie, en ek sien uit om te sien wat die mense se reaksies gaan wees,” het hy bygevoeg, duidelik dankbaar vir die geleentheid om weer voor ’n lewendige gehoor te staan.
Toe Charmaine vra wat Appel hoop die gehoor sal wegneem van sy optrede, het hy beskeie gereageer. “Ek wil nie my optrede as sulks uitsonder nie. Ek dink mense moet wegstap by Krone met ’n vol hart en sê ek het vergeet van alles wat negatief is en sê ek is bly ek het gekom.” Dit is vir hom belangriker dat die gehoor vreugde en inspirasie ervaar, eerder as om net op sy persoonlike vertoning te fokus.
Vir Appel is die kern van Krone 2024 nie in een oomblik of een kunstenaar geleë nie, maar in die geheel. Hy beskryf die vertoning as ’n legkaart, waar elke element nodig is om die prentjie volledig te maak. “As jy een stukkie van hierdie legkaart uitmekaar gaan haal, gaan alles uitmekaar val.”
“Alles is regtig vir my ongelooflik,” het hy afgesluit met sy kenmerkende passie vir die musiek en sy gehoor.
Krone 2024 het weereens bewys dat musiek steeds diep in die harte van Suid-Afrikaners leef, en kunstenaars soos Appel speel ’n groot rol om dié liefde aan te wakker.
Luister gerus na die blits onderhoud bo-aan hierdie berig.