Gerhard Steyn, die geliefde sanger agter treffers soos “Baby Tjoklits” en “Afrikaanse Meisies”, is terug met ’n splinternuwe kuierliedjie, “Naweek My Nou”. Wat dié liedjie nog meer spesiaal maak, is dat die bekende kletsrymer, Loufi, ook op die snit te hoor is.
“Ek dink die ‘my nou’ gesegde is iets wat die afgelope paar jaar groot geword het. As iemand lus is vir ’n burger, sê hulle ‘burger my nou’. Ons het dit ook baie in ons TV-program Konings van Kitskos gebruik – soos ‘pizza my nou’,” verduidelik Gerhard. Hierdie energieke snit beloof om klankgolwe oor die hele land te oorheers en luisteraars in die regte bui vir die naweek te sit.
“Ons almal werk hard en meeste mense het ’n passie vir wat hulle doen. Maar ná ’n lang week kort ons almal net ’n blaaskans. Die lirieke van die liedjie sê dit ook perfek: ‘vat ’n blaaskans, bel jou vriende want ons almal verdien dit,’” sê Gerhard.
“Naweek My Nou” is ’n popliedjie met ’n elektro ondertoon, geskryf deur Gerhard self. Hy erken dat die liedjie aanvanklik uit twee ander konsepte ontwikkel het voordat dit sy finale vorm aangeneem het. “Die inspirasie kom uit my eie lewe – ek en my vrou is besig deur die week met die kinders, sport en werk. Ná so ’n week wil mens net ’n naweek hê!”
Gerhard hoop dat die liedjie as ’n kreet vir die naweek bekend sal staan. “Ek wil hê dat mense dit Maandag al speel en reg sal wees vir Vrydag. Ek het dit al by drie van my vertonings gesing, en die gehoor se reaksie is ongelooflik. Dit is aansteeklik – my vriende sê hierdie liedjie kry hulle reg vir die naweek.”
Saam met die liedjie word daar ook ’n musiekvideo vrygestel wat presies wys hoe aansteeklik die liedjie is. “Die storie begin in ’n ouetehuis waar mense rustig brei en bordspeletjies speel. Dan hoor ’n ou oom die liedjie op die radio en skielik begin hy dans en kuier,” vertel Gerhard laggend.
Die musiekvideo is vervaardig deur Leon Barnard en geniet ook die ondersteuning van Boerboel Wear, bekend vir hul humoristiese benadering tot mode-advertensies. Die klerereeks, wat veral gewild is vir hul kakiklere vir mans en dames, het hul gewig agter die projek gegooi en voeg ’n ekstra vonk tot die produksie.