Die Afrikaanse musiekbedryf verwelkom ’n nuwe stem met ’n diep storie. Shan Read, ’n gesoute kitaarspeler, liedjieskrywer en klanktegnikus, tree uiteindelik uit die agtergrond met sy debuutenkelsnit, “Spreek Jou Vry”.
Die liedjie, wat nou op alle digitale platforms beskikbaar is, gaan gepaard met ’n kragtige musiekvideo.
Shan, wat sy musiekreis op 13-jarige ouderdom begin het, het jare lank saam met van die grootste name in die Afrikaanse musiekbedryf gewerk, insluitend Theuns Jordaan, Ricus Nel, Ampie, Liezel Pieters en Franja du Plessis. Na sewe jaar as Ricus Nel se akoestiese kitaarspeler en ’n loopbaan agter die skerms by Afrikaans is Groot, Innibos, Krone, Noot vir Noot en meer, het hy besluit om sy eie storie te vertel – en dit begin met “Spreek Jou Vry”. Shan het ook baie nou saam met Theuns Jordaan gewerk. Na Theuns se afsterwe het Shan ’n spesiale nalatenskap geërf—al Theuns se musiekinstrumente en ateljeetoerusting.
Die liedjie dra ’n persoonlike en universele boodskap oor selfvergifnis en bevryding van die verlede. “Ek het al baie foute gemaak en was nooit bang om kanse te vat nie. Maar ek het besef dat Jesus ons reeds vergewe het – ons moet leer om onsself ook vry te spreek,” sê Shan oor die inspirasie agter die lirieke.
Shan se musiekvideo vir “Spreek Jou Vry” beloof om sy emosionele reis in die ateljee vas te vang en visueel die kernboodskap van die liedjie te versterk. Met ’n ryk geskiedenis in die musiekbedryf en ’n storie wat beide rou en inspirerend is, is Shan Read gereed om sy merk te maak as ’n solo-kunstenaar.
Kyk die musiekvideo hier: