Met sy splinternuwe enkelsnit, “Whiskey & Water, Rooiwyn of Jy”, neem Logan Pietersen luisteraars op ’n diep emosionele reis deur liefde, verlange en hartseer. Die liedjie, wat op 7 Maart op alle digitale platforms vrygestel word, vang die siklus van liefde en die gepaardgaande emosies op ’n eerlike en treffende manier vas.
Volgens Logan is die liedjie geïnspireer deur sy eie lewenservarings, veral gedurende sy vroeë twintigs. “Dit was ’n tydperk van groei, lewenslesse, liefdesteleurstellings en, kom ons wees eerlik, redelik baie kuier,” sê hy. “Die verskillende drankies in die titel is metafories – whiskey en water simboliseer eensaamheid, terwyl rooiwyn geselligheid en warmte verteenwoordig, iets wat jy met ’n spesiale persoon deel.”
Een van die mees treffende lirieke in die liedjie is: “So sag soos ’n kosmos, so wild soos ’n by.” Logan verduidelik dat hierdie versreël die kontras tussen ’n vrou se sagtheid en haar wilde gees uitbeeld. “Die by en die blom het mekaar nodig om te bestaan, net soos mense in liefde en verhoudings mekaar nodig het.”
LEES OOK: Logan Pietersen se nuwe liedjie spreek tot die liefde se struwelinge
Alhoewel die liedjie diep persoonlik vir Logan is, het hy dit so geskryf dat enigeen dit op hul eie manier kan interpreteer. “Ek wil hê hierdie liedjie moet mense in die hart tref. Ons almal ervaar teleurstellings en seerkry, en ek hoop dit kan as ’n soort medisyne vir die hart dien.”
Die musiekvideo vir “Whiskey & Water, Rooiwyn of Jy” is verfilm by die ikoniese Capitol Theatre, wat met sy ryk geskiedenis ’n gepaste agtergrond vir die liedjie bied. “Ons voel regtig of ons nou ook ’n bietjie geskiedenis daar gemaak het. Ek en my vrou, Tanya Michelle, se missie is om sulke plekke te ‘uplift’ en nuwe lewe te gee – ek deur my musiek en sy deur haar passie vir dit.”
Kyk die musiekvideo hier:
Logan beplan om vanjaar meer vertonings te doen en selfs ’n toer of twee in te werk. “Ek hou daarvan om soveel as moontlik musiek te skryf en sal graag meer saam met ander kunstenaars en musikante wil werk. Ek wil mense se stories vertel en dalk selfs ‘n Engelse country-treffer of twee aanpak voor die jaar verby is.”
“Whiskey & Water, Rooiwyn of Jy” is vanaf 7 Maart beskikbaar op platforms soos YouTube, Spotify en Apple Music. Maak seker om dit te luister en Logan se musiekreis verder te volg!