Shakira het die afgelope jaar groot opspraak gemaak met haar twee enkelsnitte, “Disco” en “Spook,” wat veral jong aanhangers bekoor het. Nou maak sy gereed om haar volgende groot stap in die musiekbedryf te neem met haar splinternuwe liedjie, “Lewe Vir Jou,” wat vanaf 28 Februarie 2025 beskikbaar sal wees.
LEES OOK: Shakira se nuwe enkelsnit kom ‘spook’ by jou!
Hierdie nuwe snit is geïnspireer deur Anneli van Rooyen se ikoniese treffer, “Ek Lewe.” Shakira het besluit om haar eie stempel op die liedjie af te druk deur splinternuwe verse te skryf, terwyl sy die geliefde koor van die oorspronklike liedjie behou het. Die liedjie is vars verwerk om ’n opwindende, moderne klank te bied wat steeds resoneer met die emosie en diepgang van die oorspronklike weergawe.
“Ek wou die liedjie soveel as moontlik eg maak aan myself met wat ek al ervaar het in die lewe,” verduidelik Shakira. “Ek sing in die liedjie hoe ek gemaak is om na liefde te strewe. Al wat ek van die ander persoon vra, is om ook oop te maak. Almal verdien om liefde te ontvang en te deel.”
Aanhangers kan uitsien na ’n betowerende musiekvideo wat saam met die enkelsnit vrygestel sal word. Die video beloof om Shakira se dinamiese energie en haar passie vir liefde en musiek ten volle vas te vang.