Ná die groot sukses van sy vorige enkelsnit, “Fluit Fluit”, wys Jan-Mattys dat sy storie nog lank nie vertel is nie. Die gewilde Afrikaanse kunstenaar skop 2025 met nuwe energie af deur sy jongste enkelsnit, “Stof Skop”, op 17 Januarie bekend te stel.
Met ’n onweerstaanbare ritme en melodie wat jou voete outomaties na die dansvloer lok, beloof “Stof Skop” om die perfekte klankbaan vir lekker kuier en dans te wees. Afrikaanse musiekliefhebbers kan uitsien na ’n snit wat hulle nie net laat saamsing nie, maar ook herinneringe skep van spesiale oomblikke saam met hulle mense.
LEES OOK: Jan-Mattys ‘fluit-fluit’ na ’n platekontrak met Select Musiek
Jan-Mattys beskryf die lied as iets wat spesiaal geskep is vir daardie onbesorgde, vreugdevolle tye: “‘Stof Skop’ is een van daai liedjies wat jou die beste tye saam jou mense laat geniet, hier en nou. Dit laat jou beweeg sonder dat jy dit agter kom. Hy het ook sy eie identiteit met ‘n bietjie Afrikaanse Country en Folk.”
Die snit is die resultaat van spanwerk deur talentvolle liedjieskrywers, waaronder Jan-Mattys self, saam met Emil Paul, Stefanie Nortier, en Chané Hall. Vervaardiger Tjaart van der Walt het die lied sy unieke klank gegee, en die kombinasie van Afrikaanse Country en Folk voeg ’n vars draai by wat dit onderskei van ander dansliedjies.
Met “Stof Skop” stel Jan-Mattys nie net ’n nuwe lied bekend nie, maar begin hy ook ’n jaar propvol moontlikhede en musiekpret. Die snit is ontwerp om die lewensvreugde van sy luisteraars te verhoog en om gemeenskap, dans en vreugde te vier.
Kyk die musiekvideo hier:
Maak gereed om jou skoene af te stof en saam te skop! “Stof Skop” is vanaf 17 Januarie op alle digitale platforms beskikbaar.