Met sy kenmerkende energie en unieke musiekstyl, stel Jan Bloukaas op Vrydag, 22 November, sy tweede enkelsnit, “Wes Kaap”, bekend. Die liedjie, wat beloof om ’n regte vakansie-dans-treffer te wees, is geskep in samewerking met die ikoniese Hunter Kennedy. Hierdie vrystelling is net een week voor die bekendstelling van Bloukaas se hoogs verwagte album, “God Kan”, op 29 November.
Hunter Kennedy, bekend vir sy kreatiewe bydraes in die Suid-Afrikaanse musieklandskap, deel sy entoesiasme oor die projek: “Toe Deon (Dee Graaff Productions & Projekbestuurder vir God Kan) my vra om op ’n Bloukaas-liedjie te collab, was dit ’n no-brainer. Ek voel geïnspireer deur Jean (Jan Bloukaas) en sy energie. ‘Wes Kaap’ vat my verbeelding na Chapman’s Peak – ons cruise in ’n vintage Merc met die dak af. Dit is ’n herinnering aan die skoonheid van die lewe, selfs tussen die onregverdigheid daarvan.”
Die enkelsnit vang die vakansiegees perfek vas met sy aansteeklike ritmes en beeldryke lirieke, wat luisteraars saamvat op ’n songekusde avontuur langs die Kaapse kus.
LEES OOK: Eerste enkelsnit vanaf laaste Jan Bloukaas-album uitgereik
Die album “God Kan” beloof om een van die mees dinamiese vrystellings van die jaar te wees. Dit bevat samewerkings met van die land se mees gerespekteerde kunstenaars, insluitend Francois van Coke, Van Pletzen en Die Heuwels Fantasties. Hierdie string samewerkings gee die album ’n diverse klank en beklemtoon Bloukaas se veelsydigheid as kunstenaar.
Jan Bloukaas is nie net passievol oor musiek nie, maar ook oor om ’n verskil te maak. Hy gebruik sy platform om jong mense met kanker te ondersteun deur ’n fondsinsameling op BackaBuddy.
Ondersteun ook Bloukaas se missie om musiek te gebruik vir ’n groter doel en help om ’n verskil te maak in die lewens van jong kankerpasiënte.