Die talentvolle Wentzel, wat almal se harte verower het met sy vorige treffer “Meisie wat kan vasdans”, is terug, maar hierdie keer wag hy in spanning op ’n oproep wat die dinamiek van sy nuwe enkelsnit sal vorm. Op 27 September 2024 maak Wentzel se nuutste vrystelling, “Annabel”, sy debuut, en dit beloof om luisteraars weer na die dansvloer te trek vir nóg ’n onvergeetlike sokkie.
Net wanneer jy dink jy kan rus, laat “Annabel” nie toe dat jou voete stilstaan nie. Die aansteeklike refrein, wat lui:
“My Annabel, my Anna, wanneer gaan jy bel? Want ek wag al te lank, nou bel ek maar vir jou. Hier’s plek wat ek net vir jou hou. So Anna, antwoord net gou!”
dra die vreugde en spanning van iemand wat wag vir daardie een spesiale oproep.
“Annabel” is ’n voete-stamp nommertjie wat deur Wentzel self geskryf is, saam met die talentvolle Emil Paul. Die vervaardiging is meesterlik hanteer deur Casette Club (Tjaart van der Walt en Austin Hulme), wat ook verantwoordelik was vir die sukses van “Meisie wat kan vasdans” en “Juffrou Riekie Louw”.
LEES OOK: Wentzel nooi al die ‘meisies wat kan vasdans’ met nuwe snit
“Annabel”, vertel Wentzel, is die meisie wat al jou boksies afmerk, maar sy toon geen belangstelling nie. Jy wag vir haar om te bel, maar jy is nie seker of jy haar moet bel nie. Hierdie speelse en effens ondeunde storie resoneer met enigeen wat al in so ’n situasie was – die onsekerheid van wag op iemand anders se aandag.
Met hierdie nuwe enkelsnit bewys Wentzel weereens dat hy nie net ’n boer in murg en been is nie, maar ook iemand wat weet hoe om sy aanhangers te bederf met lekker sokkietreffers. Maak dus gereed om jou skoene weer vas te bind, want “Annabel” gaan beslis die dansvloere aan die brand steek!