Ruhan du Toit, bekend vir treffende liedjies soos Monumentaal en Val Op Jou Knieë, bring nou weer ’n inspirerende liedjie met ’n boodskap van hoop én trots. Sy nuutste Afrikaanse kontemporêre liedjie, Jy Hoort Hier, vier jou plek in jou land en omgewing, en herinner ons aan die rykdom van positiewe aspekte wat ons kan waardeer en bydra tot ’n beter toekoms vir ons en ons kinders.
Die konsep en oorsig vir die liedjie is gedoen deur dr. Dirk Hermann, bestuurshoof van Solidariteit, met die lirieke en musiek deur Marco van Deventer en Georic Lomas. “Die storie agter die liedjie is hoofsaaklik om mense weer opgewonde en positief te kry oor die vooruitsig van hierdie wonderlike land waarin ons bly. Ja, met al sy foute het ons nog steeds soveel om voor dankbaar te wees,” sê Ruhan.
Jy Hoort Hier vorm ook deel van Solidariteit se #JyHoortHier-veldtog. “Met hierdie veldtog sê ons hoe Afrikaners steeds bereid is om die uitdagings aan te pak wat ons so dikwels in Suid-Afrika moet trotseer. Ons antwoord ook die vraag oor hóékom ons dan bereid is om dit te doen: Want ons hoort hier,” het dr. Dirk op sy beurt gesê.
Ruhan erken dat dit deesdae moeilik is om te voorspel hoe ’n liedjie gaan vaar. “Maar gebaseer op die positiewe sukses wat ons destyds met Die Land en Monumentaal behaal het, glo ek dit is weer tyd vir so ’n liedjie en dat mense regtig daarvan sal hou,” voeg hy by.
“Dis ’n liedjie wat siels kos na die tafel bring en dit boonop met ’n lekker energieke tempo en interessante melodieë,” sê hy.
’n Musiekvideo wat die egte Suid-Afrikaanse essensie uitbeeld, gaan ook saam met die liedjie uitgereik word. Dié video, wat deur Atlas Media verfilm is, beeld elemente soos rugby, geloof en familie uit. “Die liggies aan die einde is elkeen wat sy hand opsteek om ’n verskil te maak. SO – steek jóú liggie aan saam my,” sê Ruhan. Die video is verfilm op verskeie plekke en huishoudings in Pretoria, met die orkes gedeelte by Sorcery in die ooste van Pretoria.
Kyk die musiekvideo hier:
Ruhan hoop sy musiek bring ’n gevoel van behoort en trots. Hoewel hy al baie hoogtepunte in sy loopbaan kan uitsonder, noem hy sy eerste Afrikaans is Groot-optrede in 2016 as sy eerste antwoord. Hy het ook ’n enkelsnit of twee op pad, “miskien ietsie ligs en aan die kuier kant,” verklap Ruhan.