Vyf-en-twintig jaar het verbygegaan sedert die legendariese Gé Korsten se wonderlike stem vir altyd stil geword het, maar sy invloed op die Suid-Afrikaanse musiek- en teaterwêreld bly steeds lewendig. Vanjaar vier Lefra Produksies hul 30ste bestaansjaar en in hul strewe om hierdie mylpaal spesiaal te maak, het hulle besluit om hulde te bring aan een van die land se grootste internasionale supersterre met Frans Swart se huldeblykproduksie, Gé Sing: Hoor My Lied.
LEES OOK: Gé Sing – Hoor My Lied terug by Atterbury Teater op publieke aanvraag!
Frans Swart, die regisseur van die produksie, het saam met die musikale regisseur, Chanie Jonker, dadelik besef dat hulle ’n liedjie benodig wat Gé Korsten se lewe en nalatenskap vasvang. Dit was nie genoeg om net sy bekende liedjies te sing nie; daar moes ook ’n lied wees wat oor homself handel. So is die lied Ons Gé gebore. Na die eerste opvoering van Gé Sing: Hoor My Lied, was die reaksie van die gehoor oorweldigend. Mense het gevra waar hulle hierdie diepgaande lied weer kan luister en dit het gelei tot die professionele opname van Ons Gé.
Die skepping van ’n lied vir ’n legende
Hoe vang mens ’n legende soos Gé Korsten se lewe in een liedjie saam? Swart verduidelik dat dit ’n groot uitdaging was. “Gé was baie lief vir die see, sy mense en vir Suid-Afrika. Dit is die essensie waaroor Ons Gé gaan. Hy was so ’n innemende mens en het altyd geglimlag en lekker gelag. Ons wou al daardie elemente in een liedjie saamvat,” sê Swart. Hierdie taak het vereis dat hulle diep delf in die kern van wie Gé Korsten was, om die ware gees van sy persoonlikheid en sy liefde vir die lewe te weerspieël.
Stephanie Baartman: Die stem agter Ons Gé
Die talentvolle sangeres Stephanie Baartman, wat Ons Gé in die teaterproduksie sing, dra die lied met haar ryk en sterk stem. Stephanie het haar televisiedebuut gemaak in die derde seisoen van Supersterre in 2010 en het daarna haar pad gevind na die harte van kykers as Bianca “Bibi” Bhele in Getroud met Rugby op kykNET. Sy het die hoëhak skoene van Bibi verruil vir die voorskoot van Lettie Adonis in Diepe Waters, maar in Ons Gé toon sy ’n nuwe dimensie van haar talent deur die diep emosionele betekenis van die lied oor te dra.
Die erfenis van Gé Korsten
Linda Korsten, een van Gé se dogters, het ook haar waardering uitgespreek vir die lied. “Ons Gé – wat ’n pragtige lied wat hom so mooi uitbeeld. Hiermee sal ons hom nooit vergeet nie en altyd in ons harte hou,” sê sy. Hierdie liedjie dien as ’n tydlose herinnering aan die nalatenskap van Gé Korsten en bevestig dat sy invloed steeds deurleef in die harte van sy aanhangers en geliefdes. Gé Korsten mag dalk vyf-en-twintig jaar gelede vir altyd stil geraak het, maar sy stem en die invloed wat hy op Suid-Afrika gehad het, sal nooit vergeet word nie. Gé Sing: Hoor My Lied en die lied Ons Gé is nie net ’n huldeblyk aan ’n groot man nie, maar ook ’n viering van sy lewe en nalatenskap. Dit herinner ons aan die krag van musiek om ons te verbind met diegene wat ons verloor het en om hulde te bring aan diegene wie se invloed vir altyd sal voortleef.