Carley het die voorreg gehad om haar debuutenkelsnit, Baadjie, te skryf en te vervaardig. Hierdie liedjie het haar in staat gestel om saam met twee uitmuntende vervaardigers, Deon Dee en Ruan Graaff van DeeGraaff Produksies te werk, wat die hele prentjie bymekaar gesit het. Hul professionele benadering en kreatiewe insig het haar visie vir Baadjie lewe gegee.
Almal hunker daarna om die nommer een opsie in iemand se lewe te wees, ongeag die tipe verhouding. Die hartseer realiteit is egter dat ’n mens soms net die opsie is wat altyd beskikbaar is, die een waarop teruggeval kan word. Hierdie gevoel is die inspirasie agter Baadjie. Carley sien hierdie dinamiek deesdae baie meer raak en het gedink dit is belangrik om ’n liedjie daaroor te skryf waarmee almal kan identifiseer.
Die terugvoer wat sy tot dusver ontvang het, was oorweldigend positief! Baadjie het reeds die top-20 op Harties FM gehaal en het oor die 15 000 strome op alle stroomplatforms. Die liedjie bring ’n vars, alternatiewe-pop, ligte en energieke klank vir die luisteraar. Dit is iets wat maklik in jou kop vassteek, maar dit het tog ’n mate van diepte.
Vir Carley is musiek ’n universele taal wat boekdele spreek en met ’n mens praat soos niemand anders kan nie. Sy wil hê haar musiek moet vir die luisteraar ’n gevoel van ‘tuis wees’ skep. Die luisteraar moet weet dat hulle nie alleen is nie. Sy wil hê mense moet saam lag, dans, en indien nodig, saam huil, want dit is heeltemal aanvaarbaar.
Carley is reeds besig met haar volgende enkelsnit en is baie opgewonde daaroor. Skryf en musiek is haar passie en sy sien nie haar toekoms sonder een van die twee nie. Sy het ook planne om na skool verder te studeer, want sy glo dat tersiêre onderrig noodsaaklik is vir enige beroep en dat sy net daarby kan baat.
Hoewel Carley nog nie lank in die musiekbedryf is nie, het daar al soveel dinge gebeur waarvoor sy ongelooflik dankbaar is. Sy het die voorreg gehad om die temalied vir een van Pretoria se grootste feeste, die Pretoria-Fees, te skryf en dit voor duisende mense te sing, saam met haar debuutenkelsnit, Baadjie. Sy het die verhoog gedeel met van die land se musiekreuse soos Spoegwolf, Elandré en Demi Lee Moore.
Carley sien haarself as ’n doodgewone meisie met baie groot drome. Sy deel haar ouers se liefde vir musiek en as kind was daar altyd musiek in die huis, maak nie saak wat die situasie was nie. Musiek was die toevlug en die antwoord op alles. Sy het ongeveer ’n jaar gelede begin optree, nadat sy verlede jaar vir Die Kontrak ingeskryf het. Twee jaar gelede het sy sosiale media aangedurf om haar passie met ’n groter gehoor te deel.
Sy kan nie net een kunstenaar uitsonder wat haar inspireer nie. Mense soos Elandré, Francois van Coke, Karen Zoid, Zaan Sonnekus, Janie Bay en Tasché inspireer haar en dit sal ’n droom wees om saam met enige van hierdie fantastiese kunstenaars te werk. Alternatiewe musiek floreer op kreatiwiteit en gee kunstenaars die vryheid om verskillende klanke en style te meng om iets totaal uniek te maak.
Buite musiek het Carley ’n groot liefde vir skedules. Sy beplan gewoonlik vêr vooruit en maak voorsiening vir alles wat moontlik verkeerd kan loop. Om ’n musikant te wees, vereis baie selfdissipline en deursettingsvermoë. Die dag toe sy besluit het om ’n musikant te wees, het sy besef dat sy groot verandering nodig gehad het. Daarom het sy die hoofstroomskoolstelsel verruil vir tuisonderrig, sodat sy meer tyd aan haar musiekloopbaan kan spandeer.
Carley is tans besig met ’n paar nuwe liedjies, maar haar gunsteling op die oomblik is Mag ons?. Net soos Baadjie vertel dit ’n storie, hierdie keer oor die goedkeuring van ander om iemand lief te hê.
Vinnige Vrae
- Beste dag van die week? Woensdag
- Gunsteling seisoen? Herfs
- Wat laat haar lag? Mense en hul dinge
- As sy een “superpower” kon hê, wat sou dit wees? Teleportasie
- Facebook of Instagram? Instagram
Musiek is Carley se lewe en sy sien uit daarna om meer stories met die wêreld te deel. Bly ingeskakel op haar sosiale media vir haar volgende vrystelling!
Luister Baadjie nou op alle stroomdienste soos Apple Music, Spotifty, Deezer of YouTube Music.