Sonja Herholdt is beslis een van die mees erkende musikante wat Suid-Afrika nog opgelewer het. In 1975 met haar eerste treffer, Ek verlang na jou, het sy diep in die harte van Suid-Afrikaners gekruip.
Sonja het vir ses jaar opeenvolgend agt SARIE (South African Recording Industry) toekennings in die kategorieë Beste Vroulike Sanger en Beste Album gewen. Sy het ook twee Lewenslange Toekennings ontvang deur Skouspel (2010) en Huisgenoot Tempo Toekennings (2010).
Deur die jare het Sonja talle albums uitgereik en nie net op eie bodem lof verwerf nie, maar ook oorsee. Sy was die eerste Suid-Afrikaanse sangeres ooit wat genooi was om in Nederland op te tree.
Haar liedjies van Waterblommetjies tot Skipskop is bekend daarvoor dat dit emosie opwek. Dit is liedjies wat uit die hart kom.
Sonja sê as daar een ding is wat die lewe haar geleer het, is dit dat alles voortdurend verander. Ons het ’n keuse om dit óf te aanvaar – óf die les op die harde manier te leer. Sy het gekies om elke nuwe seisoen in haar lewe te omhels en met dit gesê kan die publiek uitsien na een van daai groot veranderinge.
Daar is inderdaad ’n nuwe wind wat vir Sonja Herholdt se bekende Anton Goosen-treffer, Harlekyn waai.
Sonja het Harlekyn in 1979 vir die eerste keer opgeneem as titelsnit van haar vierde en gelyknamige album. In 1980 word hierdie album bekroon as die Beste Afrikaanse Langspeelplaat van die jaar.
Kerneels Breytenbach het daardie tyd in sy Poprubriek geskryf dat met die liedjie Harlekyn, Sonja haarself vir die eerste keer op die terrein van suiwer Afrikaanse popmusiek bevind. Hy beskryf Harlekyn as wulps en guitig met ’n sterk melodie.
Nou 45 jaar later in die digitale era raak Harlekyn besonders guitig met ’n DJ Sensasie “remix” wat hierdie baanbrekerliedjie opnuut byval sal laat vind by ’n nuwe generasie sonder om die nostalgie te verloor.
Luister na Harlekyn se Remix hier:
Die remix is nie die enigste goeie nuus nie, die ander goeie nuus is dat al Sonja se musiek ook nou digitaal beskikbaar is om te geniet.